Propietario di “Duikschool” Boka Samí ta kue propiedat di Gobièrnu hunga doño riba dje
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 4 di mart 2024
Tópiko: Petishon pa dirigí pregunta na Minister di Salubridat Públiko, Medio Ambiente i Naturalesa
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Salubridat Públiko, Medio Ambiente i Naturalesa señor Javier Silvania.
Danki pa e koperashon.
Atentamente,
David Seferina
Parlamentario pa
frakshon di MFK
Minister di Salubridat Públiko, Medio Ambiente i Naturalesa
Señor Javier Silvania
PRESENTE
Kòrsou, 4 di mart 2024
Tópiko: Propietario di “Duikschool” Boka Samí ta kue propiedat di Gobièrnu hunga doño riba dje
Apresiabel minister Javier Silvania,
Miembro di parlamento pa frakshon di Movementu Futuro Kòrsou ( MFK), David Seferina a tuma nota di un situashon kaminda abitantenan di Boka Samí no ta muchu kontentu, despues ku propietario di “Duikschool” a kue un baño públiko i konbertí esaki den un bodega.
Frakshon di MFK den su avanse ku e enkuentronan di “Bin papia ku nos” a bishita 2 di mart último e bario di boka Samí i bisindario. Akinan vários di e abitantenan a trese e punto dilanti ku nan ke pa e WC públiko ta aksesibel bèk pa públiko.
Abitantenan di e bario Boka Samí a manda karta pa gobièrnu kaminda ta ekspresá nan preokupashon. Den un karta data 20 di aprel 2023 Gobièrnu a honra e preokupashon di e abitantenan i a dirigí un karta na e propietario di e “Duikschool” pa denter di 1 siman e evakuá for di e WC públiko.
Awe ta bai hasi kasi un aña ku ainda e propietario no a sigui òrdu di gobièrnu.
P’esei pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di Salubridat Públiko, Medio Ambiente i Naturalesa señor Javier Silvania;
- Minister ta na altura ku te na e momentu aki e propietario di e “Duikschool” na Boka Samí ta uzando e WC públiko komo bodega?
- Minister ta na altura ku a manda karta mas ku un biaha pa e propietario evakuá for di e WC públiko?
- Minister por splika Parlamento kiko ta bai pasa ku e WC públiko despues ku e propietario no a sigui òrdu di gobièrnu?
- Minister tin pensa pa drecha e infrastruktura di e WC públiko aki?
Rekordando bo persona na e obligashon den nos areglo di estado pa duna miembronan di parlamento tur informashon rekerí i na e obligashon den e protokòl firma entre parlamento i gobièrnu pa duna e informashon aki no mas tarda ku denter di (2) luna, frakshon di MFK ta keda en espera di bo kontesta.
Atentamente,
David Seferina
Parlamentario pa
frakshon di MFK
