Delegashon di Parlamento huntu ku FKP na Asobancaria (Asosashon di Bankonan Colombiano)
Delegashon di Parlamento huntu ku FKP na Asobancaria
(Asosashon di Bankonan Colombiano)
Bogota, djaluna 4 di mart 2024, Delegashon di Parlamento di Kòrsou kompañá pa representantenan di Fundashon Kas Popular (FKP) a realisá un bishita serka Asobancaria. E asosashon di banko aki ta un piesa importante den realisashon di e modelo kolombiano di “Mi casa Ya”. Durante e bishita aki e CEO di Asoban caria, sr. Jonathan Malagón, a duna un presentashon, spesialmente trahá pa e delegashon di Kòrsou. E presentashon ta titulá “Colombia: The incomplete housing revolution”.
Apesar di e gran éksito rekonosé rònt mundu di e modelo pa bibienda sosial di Colombia, ketu bai e idea di e proyekto tin su retonan. Gran parti di e retonan ta esnan polítiko. Sr. Malagón ta splika ku e akuerdo polítiko ta e aspekto di mas importante den e trayekto. Bisando esaki e ta indiká ku e aspekto polítiko ta mesora e kriptonita di e proyekto. E otro aspektonan tékniko ta muchu mas fásil pa manehá.
Algu sumamente interesante ku tambe a keda trese dilanti, ta e investigashon i análisis kual ta indiká ku na e momentunan aki ta bende muchu mas tantu kas rònt mundu. E tres motibunan prinsipal pa e fenómeno ariba menshoná ta lo siguiente:
- Invershon den kas (propiedat inmóbil) ta un invershon sigur, sin muchu rísiko.
- “Downsize household”. Ta un trènt ku e kasnan ta birando mas chikí. Ménos yunan ta nase mundialmente i yunan awendia ta purá pa sali fo’i kas di nan mayornan i traha nan mes flèt.
- “Multipurpose housing”. Kasnan ta wòrdu usá pa traha i studia tambe.
E idea prinsipal den e modelo kolombiano di “Mi Casa Ya” ta: Pone e sèn di traha kas den saku dje pueblo, esta di e kliente. Di e manera aki e kontratistanan mester bai kompetí i hisa nan nivel di servisio pa haña trabou.
Sr. Malagón ta resumí e puntonan prinsipal di modelo di “Mi Casa Ya” den tres, kualnan ta:
- Kambio di supply-driven pa demand-driven.
- Redefiní e idea di hipoteká
- Ataka efektivamente ku programanan di kas
Di e manera aki sr. Malagón a duna un bista basta amplio i kontestá tur e preguntanan ku e delegashon por ta tin. Kardinal den e trayekto di implementashon di e modelo kolombiano na un otro pais, ta ku no tin un konsepto pa tur pais. Mester adaptá e plan na e retonan di e pais en kuestion.