Women’s Steering Committee Curaçao ku rekonosementu na 10 organisashon di hende hòmber

Women’s Steering Committee Curaçao ku rekonosementu na 10 organisashon di hende hòmber

WILLEMSTAD – Women’s Steering Committee Curaçao (WSCC), riba Dia Internashonal di Hende Muhé, djabièrnè 8 di mart lo duna rekonosementu na 10 organisashon di hende hòmber ku a bin ta hasi trabou komunitario balioso pa nos komunidat. 8 di Mart ta e fecha ku Nashonnan Uní a proklamá, komo Dia Internashonal di Hende muhé. E aña aki Nashonnan Uní a skohe komo tema; invershon den  e hende muhé i inklushon. Basá riba e último aki WSCC a tuma e desishon pa duna rekonosementu na 10 organisashon di hende hòmber ku a bin ta hasi trabou komunitario balioso pa nos komunidat.

Women’s Steering Committe Curaçao, ku e aña aki ta selebrá 50 aña di eksistensia, djabièrnè awor, ku representantenan di organisashonnan miembro, lo bin huntu durante di un Santu Sakrifisio di Misa na Misa Katóliko na Santa Maria pa yama Kreador danki pa bendishonnan diario i e echo ku e organisashon a keda huntu pa mei siglo pa hasi trabou na interes di e hende muhé i nos komunidat en general. E misa ta di 9 pa 10 or di mainta. WSCC ta hasi un yamada na komunidat pa asistí na e Santu Sakrifisio di Misa

Despues di misa lo tin un enkuentro sosial na Kas Parokial di Misa di Santa Maria durante kua lo duna rekonosementu na 10 organisashon di hende hòmber. Alabes algun invitado spesial lo hiba palabra durante di e enkuentro sosial.