Mester Hasi Posibel pa Mas Studiante na Kòrsou Realisá Biahe di Estudio

 

Parlamentario Steven Croes ta apoyá studiantenan di Eligia Martir SBO ku a biaha pa Colombia pa desaroyá nan konosementu

Eligia Martir SBO a logra hiba un grupo grandi di studiante Medellin, Colombia pa un biahe di estudio. Ta trata di 33 studiante den e ramo di Kuido i Bienestar. Bou di guia di ocho dosente nan lo bishitá diferente instansia manera un pre-eskolar, sentro pa problema ku adikshon, skolnan, un sentro pa personanan daklos i e hospital mas grandi di Medellin. Esaki ta e di tres aña ku e instituto edukashonal ta logra organisá un biahe di estudio pa yuda amplia konosementu di studiante.

Según parlamentario Steven Croes, Eligia Martir SBO ta sirbi komo ehèmpel i inspirashon pa otro skolnan. Kordinadó di e biahe, dosente señor Sambo, a splika Sr. Croes na airport ku e impakto di e tipo di bishitanan aki ta grandi paso e ta habri wowo di studiantenan pa wak kiko tur ta posibel den e ramo ku nan ta studiando aden. Un studiante a splika ku e ta trahando aktualmente den e sektor di kuido na Kòrsou i e ta antisipá ku durante e bishita e lo optené hopi idea i método ku e por apliká den su trabou i trese kambio.

Sr. Croes, kende komo Parlamentario i èks minister di enseñansa ta sigui e desaroyonan di aserka, ta suprayá e importansia di biahenan di estudio den paisnan manera Colombia kaminda konosementu i teknologia ta riba un nivel haltu. Hopi studiante ta traha kaba i banda di lokual un bishita asina ta hasi pa nan estudio, e tin un efekto positivo grandi pa nan na boka di trabou.

E ta spera ku den futuro serkano mas skol por organisá biahenan di estudio paso nan ta sirbi tambe komo motivashon pa studiantenan una bes nan wak tur e posibilidatnan laboral i di edukashon mas avansá ku ta eksistí pa nan tipo di estudio