LANSAMENTU PATH 2024

Ayera den oranan di anochi, Minister di Hustisia, mr. Shalten Hato di forma ofisial a introdusí un
organisashon hudisial nobo den Ministerio di Hustisia, kual tin e nòmber di ‘PATH’. E abreviashon
‘PATH’ ta identifiká e organisashon nobo ku lo tei pa Prevenshon di Abusu i Trafikashon di Hende.
Durante di su diskurso, Minister di Hustisia, mr. Shalten Hato a enfatisá riba e importansia di e
organisashon aki den e kadena hudisial pa frená trafikashon di hende i komersio di persona(nan) den
diferente aspekto.
Prevenshon di Abusu i trafikashon di hende a bira un tópiko importante den nos komunidat.
Lamentablemente hòmber i muhé, ku ta ser primintí un mihó bida aki na Kòrsou, ta ingresá di forma
legal òf ilegal na nos isla, pero ku despues ta bai traha den mayoria kaso di forma klandestino, i hasta
ku nan ta haña nan mes ta entregá nan pasaporte kontra di nan boluntat na un tersera. Hendenan ku
ta pasa miseria, a kambio di risibí untiki sèn pa por sobrebibí. Lamentablemente tin hendenan lokal,
nasé aki na Kòrsou ku tambe ta víktima di trafikashon di hende òf ta ser usa komo instrumento pa
yega na dilnan faboral, pa reklutá hende pa kasonan di e indolé aki. Esaki ta algun di e ehèmpelnan
pero tambe kasonan diario ku sa tei den publisidat, kual a pone ku komo Minister di Hustisia mester a
tuma e desishon di STOP i frena e abusu aki di trafikashon i kontrabanda di hende riba nos pais. Den
kuadro di esaki, a lansa netamente PATH, kual lo bai traha dirigí riba prevenshon di abusu i
trafikashon di hende.
Entrante awe, PATH lo bai intensifiká konsientisashon di e tema aki den nos komunidat. No ta un
tema tabu, ku nos por skonde sin mas. Ta un tema ku meresé e atenshon nesesario pa frena esaki
riba nos isla. PATH lo bai reklutá personal riba término kòrtiku pa duna asistensia, analisá datos di
investigashon na Kòrsou i tambe duna informashon i atende ku kampaña di prevenshon pa asina
minimalisá posibel kasonan di trafikashon di hende i tambe komersio di persona ku ta tuma lugá.
PATH lo bai duna sosten na Kuerpo Polisial Kòrsou i e idea ta, pa ser inkorporá huntu ku Interpol, pa
guiá e proseso di un forma kordiná, unda lo brindá sosten den dunamentu di informashon di posibel
kasonan di trafikashon di hende i intensifiká lasonan tambe den eksterior.
Durante di e lansamentu ofisial ayera nochi, Minister di Hustisia, huntu ku Sekretario di Estado di
Hustisia i Seguridat, Eric van der Burg, i Kordinador nashonal di PATH, Saïd Hensen a hasi desvelo di
e logo nobo di e organisashon, kual ta simbolisá ‘path’, pianan i rastro ku hopi bes ta e indikashon- di
entrada ilegal na nos isla, pero tambe a desvelá un vehíkulo nobo ku e organisashon lo bai usa. E
artista Bagira Tizraoui, a presentá e inspirashon i e diseño úniko pa PATH na e públiko presente ku a
keda fásina di e diferente diseñonan ku pronto lo ta visibel na diferente lokalidat rònt Kòrsou den
kuadro di e kampaña di konsientisashon PATH na komunidat