Petishon pa dirigí pregunta na Minister Charles Cooper

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 18 di mart 2024

 

Tópiko: Petishon pa dirigí pregunta na Minister Charles Cooper

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Trafiko, Transporte i Planifikashon Urbano, señor ing. Charles Cooper.

 

Danki pa e koperashon.

 

Atentamente,

 

 

Frenciss “Renny” Lourens

Parlamentario pa

frakshon di MFK

 

 

 

Minister di Tráfiko, Transporte i Planifikashon Urbano

Señor Charles Cooper
PRESENTE

Kòrsou, 18 di mart 2024

Tópiko: Iluminashon di e kareteranan ku no ta disponé di e infrastruktura di Aqualectra manera e asina yama “kloof” riba weg naar Westpunt, weg naar Lagun i otronan.

 

Apresiabel señor Minister,

 

Suskrito ta kontentu ku e tremendo trabou ku bo persona ta desplegando pa aliviá, optimalisá i drecha infrastruktura di pais asfaltando nos kayanan, yenando burakunan aki aya i tambe iluminando nos kareteranan. Esaki naturalmente ta algu di aploudí, pa motibu ku un bon infrastruktura ta sumamente importante pa desaroyo i ekonomia di nos pais.

 

Iluminashon, seguridat, kòntròl, tur esakinan ta aspektonan importante di infrastruktura ku mester tene debido kuenta kune pa tantu e automobilista komo e peaton ku ta hasi uzo di nos kamindanan. Na Kòrsou nos tin algun area ku entre otro pa motibu di falta di infrastruktura no tin e posibilidat adekua pa iluminashon.

 

Un di e kamindanan aki ta e asina yama “Kloof” situá den e area di Banda Bou riba kaminda “Weg naar Westpunt” despues di “Krakeel”. E area aki ta sin iluminashon pa basta aña kaba i ta forma un peliger i hasta un trauma pa sierto automobilistanan. Esaki ta pone automobilistanan pa den oranan di anochi kwe un otro ruta, ku hopi bia ta resulta mas largu, pa por yega nan kas òf kualke otro destinashon ku nan tin.

 

Ta un area di aproksimadamente 4,5 km ku den oranan di anochi ta pretu pretu i ku habitantenan di entre otro Wèspén, Mishe, Sabaneta, Rab’i yuana, Wakawa, Flip, Rust en Pad, Kabaje, Sta Krus, Barber, Bou Barber, Dokterstuin, Lelienberg, Asunshon, i tur e sobra barionan eibanda ta hasi uzo diariamente di dj’e durante oranan di anochi. Konsekuentemente e parti aki, esta “ Kloof ” ta un kaminda bastante frekuenta pa automobilistanan di no solamente Banda Bou, sino tambe di bishitantenan di otro areanan di Kòrsou ?

 

Teniendo kuenta ku e situashon alarmante aki i tambe konsiderando ku den un kaso di emergensia riba e kaminda aki e automobilista lo ta den skuridat i sin komunikashon, suskrito ta di opinion ku ta importante pa hasi sr. Minister Charles Cooper algun pregunta relashoná ku e preokupashon aki ku ta biba pa basta tempu kaba den e pueblo di Banda Bou pa asina purba trese un kambio den e situashon alarmante i peligroso aki pa alivia e habitantenan di Banda Bou i tambe tur esnan ku pa un òf otro motibu ta hasi uzo di e karetera aki i tambe di e otro kareteranan ku ta den mes un situashon.

 

1. Minister ta na altura di e situashon ku tin den “Kloof”?
2. Minister ta na altura di e kantidat di automobilistanan ku diariamente ta trafíka den oranan di anochi den “Kloof”?
3. Minister ta na altura ku den “Kloof” e señal di telefònnan mobil ta kasi nulo?

 

 

 

 

4. Minister ta na altura ku den kaso di un emergensia den e area ei e automobilista lo ta den skuridat i sin komunikashon?
5. Kon Minister ta pensa pa atende struktural i permanentemente ku e situashon aki den korto tempu?
6. Minister ta disponé di e fondonan nesesario pa hasi esaki kisas e aña aki mes?

 

Teniendo kuenta ku tur e aspektonan aki i komo un humilde representante di pueblo, uriundo di Banda Bou mi ta aserká sr. Minister ku e petishon pa por fabor, den kuadro di mehora nos infrastruktura i mas importante ahinda e aspekto di seguridat den kaso di un emergensia, laga wak kiko por hasi pa mas pronto ku ta posibel alivia e situashon den e area aki prinsipalmente pa e habitantenan di Banda Bou ku mester hasi uzo regularmente di e ruta aki.

 

Mi ta kompletamente konvensí, mirando e echo ku infrastruktura ta minister su “baby” i tambe mirando kon minister a bin ta move ku alma, kurpa i kurason drechando pais su infrastruktura, ku minister sí lo duna oido na e pueblo di Banda Bou i hasi lo maksimo pa trese un solushon struktural mas pronto posibel pa e situashon aki.

 

 

 

Atentamente,

 

 

 

Frenciss “Renny” Lourens.

Parlamentario pa

frakshon di MFK