Minister Pisas a inspekshoná playanan ku a drecha despues di mal tempu   

Willemstad – Djadumingu último Minister enkargá ku Agrikultura, Medio Ambiente i Naturalesa señor Gilmar Pisas a inspekshoná algun playa ku a keda drechá despues di a sufri daño durante e último mal tempu. Minister Pisas huntu ku funshonarionan konserní di Ministerio di GMN a bishitá playa di Sta. Cruz, Kenepa Grandi i playa Piskadó i minister ta satisfecho ku e trabounan. E trabounan a keda hasí bon, di forma profeshonal i den un tempu relativamente korto.

Na algun sitio na e playanan ainda tin piedranan ku mester laga kita pero por lo demas playanan na Banda Bou ta den bon estado bèk i kla pa risibí nos hendenan lokal i turista durante e periodo di Siman Santu ku ta bini. E playanan ku a wòrdu drechá ta; Sta. Cruz, Kenepa Chikí, Kenepa Grandi, playa Piskadó i Daaibooi. Na playa di Sta. Cruz Minister Pisas a tuma nota tambe di e fasilidatnan di piskadó ku mester wòrdu drechá. Durante e dianan ku ta bini kontratistanan lo duna e playanan e toke final pa terminá ku e proyekto.