Impulsá prinsipalmente pa konstrukshon i turismo CBCS: Kresementu lo kontinuá na tur dos pais di union monetario

Impulsá prinsipalmente pa konstrukshon i turismo
CBCS: Kresementu lo kontinuá na tur dos pais di union monetario

WILLEMSTAD/PHILIPSBURG – ‘Segun e ultimo proyekshon, ekonomia di tur dos pais di e union
monetario lo sigui krese den 2024, aunke na un ritmo diferente pa kada pais. Pa Kòrsou, ta
proyektá ku kresementu di PIB real lo aselerá te na 4,8%, miéntras ku pa Sint Maarten, ta
premirá ku e lo baha te na 3,0%.

Konsistente ku e proyekshon di desaroyo di preis na e partnernan komersial prinsipal di Kòrsou,
inflashon na Kòrsou lo sigui baha te na 2,5%. En kambio, pa Sint Maarten, ta premirá ku inflashon
lo subi te na 2,5%, ya ku ta parse ku oumento di preis di produkto riba merkado internashonal ainda
mester tin su efekto den preisnan lokal.
Esaki por lesa den e Boletin Ekonómiko pa mart 2024 di Centrale Bank van Curaçao en Sint
Maarten (CBCS).
Kresementu mas haltu den invershon privá
Pa Kòrsou, e pronóstiko di kresementu pa 2024 ta 0,4 punto porsentual mas haltu ku den e
perspektiva di desèmber 2023. Esei ta debí ku e oumento den invershon privá, spesialmente den
e sektornan di turismo, utilidat, bien rais i reparashon di barku ta mas fuerte ku loke a proyektá. E
kresementu den 2024 lo ta debí prinsipalmente na demanda doméstiko, ya ku tantu gastu públiko
komo privá lo oumentá. E oumento proyektá den gastu di gobièrnu lo ta debí na tantu konsumo
komo invershon di gobièrnu. Pa demanda neto for di eksterior tambe ta premirá un oumento, ya
ku e oumento proyektá den eksportashon, impulsá prinsipalmente pa aktividat den e sektornan di
turismo i transporte, lo surpasá e oumento den gastu total di importashon.
Pa Sint Maarten, e pronóstiko di kresementu pa 2024 a keda meskos ku den e perspektiva anterior.
Meskos ku na Kòrsou, loke lo impulsá kresementu na Sint Maarten ta prinsipalmente demanda
doméstiko. Ta premirá un oumento den demanda privá, aunke esei lo ta ménos rápido ku na 2023,
ya ku sierto proyekto di konstrukshon grandi, manera aeropuerto, ta den nan fase final. Mas aleu,
demanda públiko lo oumentá debí na un oumento den invershon di gobièrnu, aunke den konsumo
di gobièrnu lo tin un bahada. Demanda neto for di eksterior lo kontribuí moderadamente na e
oumento ei, debí na un subida den eksportashon, moderá pa un oumento den importashon.
Riesgonan mas den balansa
Tin sierto faktor di riesgo supstansial, internashonal i doméstiko, ku por afektá e perspektiva akí.
Sin embargo, kompará ku ora a publiká e Boletin Ekonómiko di desèmber 2023, aktualmente e
riesgonan internashonal ta mas den balansa. Un faktor internashonal ku por tin un efekto negativo
ta un posibel retraso den fleksibilisashon di maneho monetario di e bankonan sentral prinsipal,
manera Reserva Federal Estadounidense. Te na e momento akí, ta premirá ku e fleksibilisashon ei
lo kuminsá den e di dos mitar di 2024. Un retraso asina lo nifiká ku kosto di finansiamentu lo keda
haltu. Esei, na su turno, lo afektá kresementu na nivel mundial i pues tambe di e union monetario.
Algun otro faktor ku por tin un efekto negativo riba kresementu na Kòrsou i Sint Maarten ta un
posibel reseshon na Estádos Unídos, ku ta e partner komersial prinsipal di e dos paisnan, i un
prolongashon di e tenshonnan geopolítiko, manera e guera na Ukrania òf un eskalashon di e
konfliktonan den Medio Oriente ku lo inkluí Laman Kòrá.
Di otro banda, si e fleksibilisashon di maneho monetario sosodé ántes ku loke a premirá pa motibu
di un bahada mas rápido di inflashon, i si e gobièrnunan di e ekonomianan mas grandi warda mas
ku loke a premirá pa para e apoyo fiskal ku nan ta ofresé, esei lo kontribuí na kresementu mundial
i lo tin un efekto positivo indirekto riba e ekonomianan di Kòrsou i Sint Maarten.
Ennia i COVID-19
Na nivel doméstiko, e faktornan di insertidumbre ta inkliná mas den direkshon negativo. E riesgo
prinsipal tin di aber ku resolushon di e problemátika di ENNIA. Si tarda pa kaba di yega na un
strategia faktibel pa solushon’é, esei por tin efekto grave riba tereno makroekonómiko i sosial. No
opstante, en bista di e hoofdlijnenakkoord ku a keda firmá resientemente pa e stakeholdernan
prinsipal, manera gobièrnu di Kòrsou, gobièrnu di Sint Maarten, i CBCS, aktualmente e riesgo akí
ta mas moderá.
Otro riesgo importante pa e perspektiva akí, i prinsipalmente pa finansa públiko, tin di aber ku
refinansiamentu di e kréditonan di likides ku e paisnan a risibí durante e pandemia di COVID-19.
Na òktober 2023, a refinansiá e kréditonan akí pa un plaso di un aña, na un interes di 3,4% pa Sint
Maarten i 5,1% pa Kòrsou, en espera di un strategia di solushon viabel pa ENNIA. Un
refinansiamentu di e fiansanan akí bou di kondishon mas faborabel lo kontribuí bastante na
sostenibilidat di finansa públiko di e dos paisnan.
E teksto kompleto di e Boletin Ekonómiko di mart 2024 ta disponibel riba wèpsait di CBCS na
https://www.centralbank.cw/publications/economic-bulletins/2024.
Willemstad, 22 di mart 2024
CENTRALE BANK VAN CURAÇAO EN SINT MAARTEN