Mester bini ku reforma struktural pa sostené kresementu CBCS: Debe públiko di e paisnan ta sostenibel

WILLEMSTAD/PHILIPSBURG – Na 2020, e kuota di debe a yega na su nivel mas haltu,
prinsipalmente debí na e pandemia di COVID-19. Pa mediano plaso, ta proyektá ku e kuota di
debe lo baha te na 64,7% pa Kòrsou i 35,1% pa Sint Maarten na 2027, segun Boletin Ekonómiko
di Centrale Bank van Curaçao en Sint Maarten (CBCS) pa mart 2024.

‘Un pregunta ku ta lanta ta si e desaroyo proyektá di e kuota di debe di gobièrnu ta sostenibel. Ta
konsiderá ku un pais su kuota di debe ta sostenibel si gobièrnu di e pais por kumpli ku tur su
kompromisonan di pago, aktual i den futuro, sin hañ’é obligá di hasi ahuste presupuestario grandi
òf restrukturá e debe ku e tin serka su kreditor- i invershonistanan,’ asina Presidente di CBCS
Richard Doornbosch a indiká.

DSA 2023-2027
E Boletin Ekonómiko mas resien ta presentá un análisis di sostenibilidat di debe (na ingles, ‘debt
sustainability analysis’ òf DSA) pa Kòrsou i Sint Maarten pa e periodo di 2023−2027. Un análisis
asina ta sirbi pa evaluá vulnerabilidat di debe di gobièrnu. Spesífikamente, e ta evaluá e riesgonan
ku por afektá sostenibilidat di debe públiko segun indikadó fiskal i makroekonómiko (manera saldo
presupuestario primario di gobièrnu, kresementu di PIB real, tasa di interes i inflashon) ta desaroyá
den futuro.
‘Den liñanan general, e análisis hasí ta mustra ku, den e senario di referensia, debe públiko di tantu
Kòrsou komo Sint Maarten ta sostenibel riba término mediano, i esei ta debí ku ta proyektá un
bahada den e kuota di debe.’ Presidente di CBCS a agregá sí ku ‘no por keda sin hasi sierto remarke
importante den e kuadro akí’.
Kuater remarke importante
‘Di promé, a yega na e proyekshon di e nivel di debe asumiendo ku tur dos pais lo logra refinansiá
e fiansanan di likides di COVID-19 ku ta bai vense e aña akí, na un tasa di interes di 3,6%. Ademas,
e paisnan lo mester por sigui finansiá nan invershonnan di kapital bou di e kondishonnan faborabel
stipulá den e ‘lopende inschrijving,’ Doornbosch a splika.
‘Di dos, e senario di referensia ta asumí ku lo tin un kresementu promedio di PIB real di 3,4% na
Kòrsou i di 2,4% na Sint Maarten den e periodo di e pronóstiko. Sin embargo, si nos wak historia,
ta sali na kla den e último dékada, prestashon ekonómiko di e dos paisnan tabata supstansialmente
mas abou ku e tasa di kresementu anual promedio proyektá,’ el a sigui bisa. ‘Pa Sint Maarten, esei
ta e kaso asta si laga afó e shòk ku Orkan Irma a okashoná na 2017−2018. Awor ku ekonomia di
Kòrsou i di Sint Maarten a rekuperá di e pandemia mihó ku loke a premirá, ta importante pa sigui
impulsá e ekonomianan, pa garantisá ku nan lo sigui krese riba término mediano,’ Doornbosch a
rekomendá.
Proyektonan di invershon, un desaroyo positivo
‘E análisisnan di sostenibilidat di debe ta mustra ku sostenibilidat di debe públiko di tur dos pais ta
spesialmente vulnerabel pa shòk relashoná ku PIB real. Den e kuadro akí, e proyektonan di
invershon ku ta andando na tur dos pais ta un desaroyo positivo, ya ku nan ta amplia kapasidat di
produkshon di Kòrsou i Sint Maarten. Gobièrnu di e dos paisnan lo mester tuma mas medida pa
stimulá kresementu. Nan agèndanan di maneho lo mester inkluí medida pa kombatí vulnerabilidat
riba merkado laboral, redusí burokrasia i baha e kosto di hasi negoshi,’ el a sigui bisa.
‘Di tres, pa Kòrsou i Sint Maarten por tin debe públiko sostenibel, un kondishon importante ta ku
mester implementá reforma den e paisnan su sistema di salubridat i di siguridat sosial. Di otro
manera, e sistemanan akí lo sigui pone preshon riba finansa públiko i agregá mas riesgo na
sostenibilidat di debe públiko, spesialmente debí na embehesementu di poblashon,’ asina
Doornbosch a atvertí. ‘E proseso pa reformá e sistemanan ei ta unu kompleho i lo eksigí medida
ku ta difísil pa tuma. P’esei mes, ta esensial pa enbolbé e stakeholdernan prinsipal den formulashon
i implementashon di e reformanan akí,’ el a sigui bisa.
Kolaborashon pa un análisis kompleto di sostenibilidat di debe
‘Por último, mester interpretá resultado di e análisisnan akí ku e debido koutela, ya ku nan ta basá
solamente riba e debenan ku ta di gobièrnu mes. Pa por hasi un análisis a fondo di e riesgonan
mará na debe públiko, lo mester inkluí debe di tur entidat públiko i kompania di gobièrnu den e
análisis,’ Doornbosch a indiká. ‘Ku kolaborashon di e dos gobièrnunan i tur nan entidatnan, CBCS
lo por ofresé un análisis kompleto di sostenibilidat di debe,’ asina Presidente di CBCS a konkluí.
E teksto kompleto di e Boletin Ekonómiko di mart 2024 ta disponibel riba wèpsait di CBCS na
https://www.centralbank.cw/publications/economic-bulletins/2024.
Willemstad, 22 di mart 2024
CENTRALE BANK VAN CURAÇAO EN SINT MAARTEN