Na kuminsamentu di luna di mart 2024 Direktorado di Supervishon i Mantenshon di Lei den un karta informativo a informá vários bario tokante e prohibishon di rekreashon di estadia ilegal konforme e Plan di Desaroyo Teritorial (ROB). Den e karta informativo akí a pone habitantenan na altura ku entrante 5 di mei 2024¹ Direktorado di Supervishon i Mantenshon di Lei ta bai mantené lei aktivamente pa loke ta trata rekreashon di estadia ilegal.

Esaki ta nifiká ku den e barionan ku destinashon: área residensial I, área residensial II, área residensial III, área residensial paisahe i área residensial Kunuku, no ta pèrmití rekreashon di estadia. Den e Plan di Desaroyo Teritorial (ROB) bo por mira kua destinashon ta aplikabel pa bo parsela.

Relashoná ku e kantidat grandi di notifikashon i keho, e barionan menshoná akí bou a risibí un karta informativo:

• Sabal Palm
• La Palma
• Suikerpalm
• Belnem
• Bona Bista
• Bolivia Ariba
• Nawati
• Santa Barbara
• Hato
• Sabadeco
• Lagun Hill

E barionan Rincon, Tera Kòrá, Nikiboko, Antriol i Nort’i Saliña nos ta informá entre otro di e manera akí.

Dikon esaki ta nesesario?

Rekreashon di estadia ilegal tin un influensia grandi riba e koheshon sosial den bario, pa motibu ku e hendenan akí no ta habitantenan permanente. E ta nifiká tambe ku un bibienda ku ta intenshoná pa minimalmente tres luna konsekutivo òf mas tantu, no ta disponibel pa hende ku tin mester di esaki. E tin influensia pues riba nos komunidat i riba e stòk di bibienda di Boneiru.

Nos tin mester di bo koperashon

Nos ke mantené nos barionan seif, agradabel i atraktivo pa tur hende. Pa e motibu akí nos ta pidi bo koperashon ku kumplimentu ku e reglanan akí for di e Plan di Desaroyo Teritorial (ROB).

Si bo ripará ku den bo bario tin kestion di rekreashon di estadia ilegal, mèldu esaki e ora ei na bisami_th@bonairegov.com.