Siman Santu kargá ku evento riba Brionplein pa selebrá Pasku di Resurekshon

 

Willemstad- E aña aki Brionplein lo ta sentro pa un selebrashon masal di resurekshon di Kristu Hesus. For di djaweps awor 28 di mart te ku djadumingu 31 di mart lo tin diferente evento organisá pa iglesianan Kristian pa asina konmemorá e morto di Hesus i selebrá Su resurekshon aki na Kòrsou.

E eventonan lo kuminsá djaweps awor 28 di mart kaminda lo tin Orashon Nashonal. Riba e dia aki tur iglesia lo uni pa huntu nos trese nos petishonnan i halsa nos pais Kòrsou dilanti e trono di Dios. Riba Bièrnè Santu 29 di mart i djasabra 30 di mart lo tin e festival Jesus is Alive kaminda diferente adorador lo kompartí ensenario den anochinan di alabansa i adorashon.

Pa kulminá e selebrashon di e Pasku di mas importante pa humanidat, djadumingu Pasku di Resurekshon, lo tin e evento titulá Manifestá, kaminda lo tin un tremendo anochi di alabansa i adorashon huntu ku Proskuneo, Wladimir Kleinmoedig, Jeridee “Deetje” Coco, Shelomi Doran-Bakhuis i Benjamin & Abigail Kramers.

Tur e aktividatnan aki ta grátis i lo kuminsá 6’or di atardi.

Pueblo di Kòrsou kompleto ta keda invitá pa selebrá Kristu riba e dianan aki. E eventonan aki sigur lo ta di gran bendishon pa bo bida. Laga nos ban bèk na rekòrdá i selebrá e balor imenso ku Kristu resusitá tin pa nos bida.