Zacarías Ferreíra e fin di siman aki na Kòrsou!

WILLEMSTAD: Djasabra dia 13 di aprel benidero, Zacarías Ferreíra lo ta na Kòrsou pa un solo presentashon den WTC. E kantante konosí komo ‘la voz de la ternura’ lo ta riba esenario ku henter su orkesta despues di a risibí rekonosementu “Disco Diamante” durante Premios Soberano 2024 pa su rekòrt den benta i kantidat di reprodukshon pa “Asesina”, hasiendo di Zacarías e artista di bachata mas popular durante di e último tempunan. Masha hopi fanátiko ya kaba a sigurá nan entrada pa WTC riba djasabra di 13 di aprel próksimo. E kantante mes a anunsiá riba su retnan sosial ku e ta masha entusiasmá pa su bishita i a hasi un kordial invitashon na su fanátikonan pa presensia su presentashon ku lo inkluí hitnan di semper manera “Es Tan Dificil”, “Asesina”, “La Mejor de Todas”, “Mañana en tu Olvido”, “Amiga Veneno”, “La Avispa” i mas, tambe e klásiko bachata i su hitnan di mas nobo.

 

Riba e anochi di “Sabrosura” tambe lo duna su presentashon, Kòrsou su sensashon di bachata i realmente un eksponente pa e género, Ephrem J. Un kantante ku dominio total di e género. Ephrem J, tantu aki na Kòrsou komo internashonalmente ta kanta ku artistanan di promé fila i anochi di “Sabrosura” lo no ta diferente. “Baila, Baila”, “Nada”, Cuando Se Acaba El Placer”, “Como Una Oracion”, i muchu mas lo zona riba e anochi espektakular di “Sabrosura” den WTC.  Ephrem J lo keda respaldá pa su banda internashonal ku kual tambe pronto e lo kuminsá su ‘tour’ den Latinoamérika.

 

“Sabrosura” lo konta tambe ku presentashon di ICONS, banda di aña ‘23, i Dj Jose i RA1000. ICONS lo tin un repertorio ahustá p’e anochi ku lo inkluí un variashon di merengue, salsa, bachata, i mas! Karchinan general awor ainda na 65 florin optenibel na Ticketpoint na Zeelandia, 24 Uur Uit De Muur i Mensing’s Caminada. Karchinan VIP na balor di 125 florin ta optenibel únikamente na Ticketpoint i 24 Uur Uit De Muur. Que sabrosuraaaa!