Direktorado di Supervishon i Mantenshon a finalisá 269 inspekshon den e promé kuartal 11 apr 2024
Direktorado di Supervishon i Mantenshon a finalisá 269 inspekshon den e promé kuartal
11 apr 2024
Mayoria di e inspekshonnan akí (118) tabata ku enfoke riba kontròl di instalashonnan eléktriko.
Kralendijk Bonaire
Direktorado di Supervishon i Mantenshon di Lei a finalisá 269 inspekshon eksitosamente den e promé kuartal di e aña akí. Mayoria di e inspekshonnan akí (118) tabata ku enfoke riba kontròl di instalashonnan eléktriko. Banda di esaki a hasi 55 inspekshon riba tereno di ekonomia i ‘ijkwezen’ (kontròl di midí i peso), 52 inspekshon rònt di siguridat di kuminda, 28 inspekshon general relashoná ku obligashonnan di e Ordenansa General Lokal (Algemene Plaatselijke Verordening – APK), i 16 inspekshon relashoná ku medio ambiente.
Instrumentonan di mantenshon di lei ku a hasi uso di dje
En total a hasi uso di 42 instrumento di mantenshon di lei den e promé kuartal. Mayoria mantenshon di lei a tuma lugá dentro di e proyekto ‘Lei di preis 2023 – Prijzenwet 2023’, ku enfoke riba kontròl si komersiantenan por menor ta tene nan mes na e preisnan stipulá den e ‘Dekreto di preis Bon Kompra Plùs’. Banda di esei a manda 17 intenshon di obligashon di pago, prinsipalmente dirigí riba atendementu ku estadia rekreativo kaminda
no ta pèrmití esaki. Tambe a emití 12 atvertensia pa diferente violashon di lei, i tambe un (1) karta di terminashon pa un konstrukshon i un (1) desishon di kobransa.
Informashon na suidadano
E punto di salida di Direktorado di Supervishon i Mantenshon di Lei ta keda stimulashon di kumplimentu den forma espontáneo ku legislashon i regulashon pa medio di informashon na suidadano. Den e promé kuartal a organisá dos reunion di informashon pa doñonan di stènt riba marshe i kantu di kaminda relashoná ku siguridat di kuminda. Banda di esaki a hala atenshon di 1788 doño di bibienda riba e reglanan pa ofresé estadia na turista.
Direktorado di Supervishon i Mantenshon di Lei ta sigui hasi esfuerso pa un ambiente seif i regulatorio pa tur suidadano i ta spera mas éksito den e di dos kuartal di e aña akí.