Minister Hato ta entregá vehíkulonan nobo na Reclassering

Kòrsou, 10 aprel 2024

Minister di Hustisia, mr. Shalten Hato ayera 10 di aprel 2024 a hasi entrega di dos vehíkulo
nobo na Uitvoeringsorganisatie Reclassering, den kuadro di fortifiká nan fleta di
vehíkulonan pa duna servisio na komunidat. Reclassering ta un organisashon hudisial
importante ku ta duna servisio na entre otro detenidonan, na momentu di resosialisashon.
Nan ta duna guia na èks detenidonan riba diferente tereno, manera kon pa presupuestá, kon
pa solisitá pa un trabou nobo pero tambe kon pa re-integrá bèk den nos komunidat. Pa por
kumplí ku diferente petishon, Reclassering ya pa basta aña a hasi petishon na Ministerio di
Hustisia pa ampliashon di nan vehíkulonan. For di aña 2016 tabata e delaster okashon ku
nan a risibí un vehíkulo nobo i esaki tabata limitá e trabounan diario pa bai serka e
klientenan.
Minister Hato a buska e fondonan nesesario i ayera a otorgá e dos vehíkulonan nobo nobo
aki na sra. Soraida Martines, direktor di UO Reclassering Curaçao, kual sigur a keda
sumamente satisfecho ku despues di hopi aña nan a risibí vehíkulonan nobo pa por kontinuá
ku e trabounan. E vehíkulonan a yega na e momentu oportuno, na momentu ku
resientemente nan a kaba di lansa e kampaña “Na Kaminda pa mi Trabou” unda nan ta
duna guia kompletu na èks detenidonan pa pasa den un trayekto di lès i guia pa haña un
trabou bèk den komunidat. Minister Shalten Hato a indiká na e personal di Reclassering
tambe, ku e lo siguí pusha pa nan por haña mas kolega nobo (e trayekto awor despues di
Jobfair), pero tambe pa esnan laborando por partisipá na diferente kursonan di “upgrading”
pa nan desaroyo personal.