Plataforma di Derechinan di Mucha (Plataforma IVRK) Kòrsou ta invertí den resiliensia di nos hóbennan.
Willemstad – Ministerio di Desaroyo Sosial, Labor i Bienestar; Sektor Famia i Hubentut den kolaborashon ku Plataforma IVRK ta tuma nota ku “bullying” ta sigui oumentá den nos komunidat i prinsipalmente bou di nos mucha i hóbennan. Nos ta konsiente ku e konsekuensianan por ta destruktivo i por yega ta hasta asina leu ku tin konsekuensianan fatal. Ta importante pa nos komunidat den su totalidat yuda señalá i karga ku e problema mientras gobièrnu i gruponan di interes ta yega na formanan struktural pa bai kontra e problema.
Nos ta konsiente ku a yega e momentu pa stòp i para ku e “bullying” ku ta tumando lugá den tur sorto di forma; tantu e “bullying” personal, komo esun riba plataformanan sosial-digital. Esun ku ta “bully”, esun ku ta para wak i esun ku pusha palu bou di kandela; tur ta mes kulpabel pa daño ku por dura pa bida largu na esun ku ta víktima.
E komishon di derechinan di mucha ta un identidat di Nashonnan Uní, ku ta vigilá ku paisnan ku a bai di akuerdo i firma e tratado di derechinan di mucha ta kumpli ku esaki. Pa Kòrsou e ministerio di SOAW huntu ku su otro partnernan na nòmber di gobièrnu ta karga e responsabilidat pa ku e derechi di mucha.
Un di e rekomendashonnan ku e komishon di Nashonnan Uní a duna Kòrsou ta, pa eliminá “bullying” na skol i tambe riba plataformanan sosial-digital. E rekomendashonnan, ta keda publiká despues ku Reino raportá riba su implementashon di derechi di mucha na Hulanda i e seis islanan di Reino Hulandes. Ku e rekomendashon nos dilanti, e ministerionan na nòmber di gobiernu ta keda traha pa koordiná implementashon di e rekomendashonnan i asina garantisá ku Kòrsou ta kumpli ku e Tratado di Derechi di Mucha.
Nos ta rekonosé ku tin un kaminda largu pa kana, pa por garantisá ku tur mucha na Kòrsou ta lanta den un ambiente adekuá, ku ta stimulá nan desaroyo segun nan propio kapasidat. Mará na e problema, nos ta konsiente ku mester traha mas duru riba nos muchanan su abilidat pa por dil ku desapunto, influensia negativo, sedukshon, eksklushon (sosial) i eksperensianan negativo den nan ambiente direkto òf indirekto. Bou di ambiente direkto ta kategorisá famia, skol i amigunan. Media (inkluso medionan sosial), kultura i komunidat ta kai bou di ambiente indirekto.
Sektor Famia i Hubentut di ministerio di SOAW huntu ku Plataforma IVRK tin pa algun aña kaba un plataforma di hóben komo partner di konsulta, pa tópikonan ku ta di importansia pa mucha i hóben. Nos ta komprometé den aserká e hóbennan riba entre otro e tópiko aki tambe kaminda nan por bai profundo riba e problema. Ku nan opinion i aporte nos kier garantisá un aserkamentu mihó dirigí ku solushonan ku ta duradero.
Nos ta rekomendá tur mayor pa tuma kontakto ku Sektor Famia i Hubentut di ministerio di SOAW den kaso di pregunta i/òf preokupashon en general pa ku desaroyo di nan yu te ku 24 aña na 724-5424 durante oranan di ofisina. Sektor Famia i Hubentut di ministerio di SOAW ta traha ku vários organisashon nashonal i internashonal i por referí un mayor na e organisashon korekto pa e risibí yudansa; tambe den kaso di “bullying”.
