PRESUPUESTO AMBISIOSO PA E PROMÉ KUARTAL REALISÁ

Servisio di Impuesto a anunsiá e entrada realisá pa e promé kuartal. Ta bon pa menshoná ku pa e promé kuartal tabatin un presupuesto hopi ambisioso. Na 2023, a realisá un entrada di impuesto di 362,5 mion florin den e promé kuartal. Pa e promé kuartal di e aña aki, a presupuestá un entrada di 400 mion florin, esaki ta mas ku 10% mas ku e realisashon di aña pasá. Ku e orguyo debí por informá ku a realisá un entrada di no ménos ku 402,4 mion florin den e promé kuartal, esta 2,4 mion florin mas ku loke a presupuestá. E logro aki ta ainda mas impreshonante si tene na kuenta e echo ku e tarifa di impuesto riba ganashi durante e aña fiskal 2023 a baha di 22% pa 15% pa e promé 500.000 florin di ganashi ku mester paga impuesto riba dje.

Pa mas tardá 2 di aprel último, mester a entregá e deklarashon provisorio di impuesto riba ganashi di aña 2023 i mester a paga e impuesto ku tabata debe. Te ku 2 di aprel, Servisio di impuesto a risibí 15.332 deklarashon provisorio pa aña 2023. Den esaki un montante total di 71,2 mion florin na debe di impuesto riba ganashi ta deklará. Na 2023, a presentá 14.431 deklarashon provisorio di impuesto riba ganashi pa aña 2022, ku un montante total di impuesto riba ganashi ku tabata debe di 71,1 mion florin. Si seguidamente kompará e komportashon di pago di e aña aki ku esun di aña pasá, ta mira un gran diferensia: aña pasá, di e 71,1 mion florin deklará, un kantidat di 45,8 mion florin (64,4%) paga puntualmente. E aña aki, un kantidat di 60,5 mion florin (85,0%) di e 71,2 mion florin deklará a paga na tempu. Un mehorashon hopi konsiderabel den e komportashon di pago. Den e último lunanan, a duna hopi publisidat na e konsekuenshanan ku por tin si deklarashon di impuesto riba ganashi no ta entregá na tempu i si e impuesto ku debe no ta pagá na tempu. Resientemente varios empresario a risibí kondena penal di kastigu di prizòn kondishonal pa motibu di no entregá deklarashonnan di impuesto riba ganashi (na tempu). Ademas, Servisio di Impuesto a anunsiá e aña aki pa promé biaha, ku lo imponé aanslagnan adishonal ku un multa basá riba e deklarashon provisorio. E promé impreshon ta ku e akshonnan di kumplimentu aki a duna resultado visibel.

Si nos wak e resultadonan di e otro medionan fiskal mas aleu, e entrada ta mas haltu ku lokual a presupuestá pa impuesto riba salario (+ 8,4 mion florin) i impuesto riba benta (+ 9,7 mion florin). E entrada di OZB ta mas abou ku e entrada presupuestá (-/- 11,5 mion florin). E entrada mas abou di OZB ta spliká dor di e echo ku ora di elaborá e presupuesto a tuma komo punto di partida, ku imposhon di e aanslagnan di OZB pa 2024 lo a kuminsá na mart. P’esei, ya na mart a premirá un entrada di OZB mas haltu. Entretantu, na aprel, a kuminsá ku e imposhon di aanslagnan di OZB pa 2024, pues pronto por spera esakinan den brievenbus. Pa e presupuesto, esaki ta nifiká solamente un kambio den entrada ku 1 luna. Ta spera ku e entrada presupuestá pa OZB pa 2024 tambe lo wòrdu realisá ainda.

E entradanan di e primanan sosial ku ta wòrdu kobrá na benefisio di SVB durante e promé kuartal ta un montante di 234,7 mion florin kompará ku un entrada presupuestá di 220,9 mion florin. Pues aki tambe un resultado positivo di 13,8 mion florin (6,2%) riba presupuesto.

Minister di Finansa, Javier Silvania, ta ekpresá su gran apresio na empleadonan di Duana, SBAB i Servisio di Impuesto ku a logra e resultado impreshonante aki konhuntamente.