KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Maneho Nobo pa Kuido Opstétriko (Kuido di Partera) Na Kòrsou

Maneho Nobo pa Kuido Opstétriko (Kuido di Partera) Na Kòrsou: Pa optimalisá kalidat i efisiensia ku un ròl krusial pa Fundashon Duna Lus
Minister di Salubridat Públiko, Medio Ambiente i Naturalesa (GMN) ta anunsiá implementashon di un maneho nobo di kuido opstétriko primario na Kòrsou, ku ta dirigí riba mehorá kalidat, efisiensia i kuido di pashènt. E maneho nobo aki ta basá riba konsulta ku diferente stakeholder i ta resultado di un evaluashon kuidadoso di e situashon aktual i un análisis ekstenso di e puntonan di atenshon i nesesidatnan den e sistema di kuido opstétriko primario (di promé liña).
Ademas, e maneho a keda establesé for di diferente desishonnan di Konseho di Minister, kaminda a bai di akuerdo pa sentralisá e partonan primario den òf serka di e hòspital nobo, ku un separashon kla entre kuido opstétriko primario i avansá.
Opstetrisia primario (di promé liña) i opstetrisia avansá (di dos liña) ta referí na dos nivel di kuido i sosten pa hende muhénan na estado durante embaraso, parto i periodo despues di nasementu.
Opstetrisia primario (di promé liña) ta inkluí kuido básiko ku ta ser duná prinsipalmente dor di dòkternan di kas i parteranan den ambiente poliklíniko òf na kas. E ta enfoká riba kontrol rutinario, un embaraso saludabel i partonan di riesgo abou. Parteranan ta fungi komo e promé punto di kontakto pa hende muhénan na estado, ta ehersé kontrol rutinario i ta duna konseho riba nutrishon, estilo di bida i maneho di molèsternan durante embaraso. Si surgi komplikashonnan ku ta bai mas leu di nan ekspertisio, nan ta referí e pashènt na dunadónan di kuido sekundario.
Opstetrisia avansá (di dos liña) ta inkluí kuido spesialisá duná pa departamentunan di opstetrisia den hòspital, hopi bia bou di supervishon di ginekólogonan. E nivel di kuido aki ta destiná pa hende muhénan na estado ku tin problemanan médiko kompliká, embaraso di riesgo haltu òf komplikashonnan ku ta rekerí intervenshonnan spesialisá, manera sesaria, partonan instrumental i tratamentu di komplikashonnan médiko manera preshon haltu, diabétis òf otro problemanan di salú ku por afektá embaraso.
Den hopi kaso, Opstetrisia primario i opstetrisia avansá ta palabrá ku otro pa duna e hende muhé na estado e mihó atenshon posibel, kaminda nan ta referi’é na kuido spesialisá di opstetrisia sekundario ora ta nesesario.
E maneho nobo ta enfoká riba un kolaborashon optimal entre tur e partidonan interesá, inkluyendo opstetrasia, dòkternan di kas, ginekólogonan, Fundashon Duna Lus (FDL òf Kraamkliniek), Curaçao Medisch Centrum (CMC) i seguronan di kuido, pa ofresé hende muhénan na estado na Kòrsou un eksperensia di kuido integrá i sin interupshon.
Den e desaroyo di e maneho aki, interes di tur e stakeholdernan, i partikularmente esnan di FDL, a ser konsiderá kuidadosamente. FDL ta hunga un papel esensial den kuido opstétriko primario na Kòrsou. P’esei e maneho aki a keda elaborá tambe ku partisipashon di FDL. FDL ta sostené e maneho aki i e puntonan di akshon ku a sali for di esaki.
Minister ta rekonosé e ròl vital di FDL den kuido opstétriko primario i ta enfoká pa e maneho aki no solamente mehorá kalidat di kuido, pero tambe pa haña solushon pa retonan finansiero i manehá e peligernan di kontinuidat di FDL, un partner krusial den kuido opstétriko. Huntu, pues, ta buska e métodonan mas efektivo i efisiente pa garantisá i mehorá e kalidat di kuido opstétriko.
E aspektonan klave di e maneho nobo ta inkluí:
• Desaroyo di un protokòl nashonal di kuido opstétriko: denter di kuater luna, bou di kordinashon di Inspekshon di Salú Públiko, lo elaborá un protokòl ofisial formalisá, ku ta envolví tur stakeholder relevante. E protokòl aki lo sirbi komo guia pa un práktika di kuido opstétriko simplifiká i konsistente.
• Mantenshon di FDL komo Sentro di maternidat di promé liña: Fundashon Duna Lus (FDL) lo mantené su funshon komo sentro di maternidat primario i lo wòrdu adaptá i renobá pa brinda atenshon opstétriko primario optimal.
• E dòkternan di kas tambe lo ta e promé resepshon i un punto sentral di eksaminashon pa hende muhé na estado. Nan lo evaluá e pashènt segun e Protokòl Nashonal di Kuido Opstétriko i kompilá e dokumentashon nesesario promé ku nan manda e pashènt pa e dunadó di kuido adekuá.
• Den futuro, FDL lo ta situá banda di CMC den e plan di desaroyo di Kolon. E serkansia di FDL na CMC lo fasilitá traspaso di kuido opstrétiko primario i avansá, loke ta duna e pashèntnan un sintimenti mas sigur. Ku e edifisio aki i e interior di FDL, ta krea un infrastruktura ku por ofresé e kalidat máksimo di opstetrisia primario na pashèntnan, parteranan i dòkternan di kas.
• Optimalisashon di eksaminashon di embaraso i traspaso dor di FDL: Un ginekólogo eksperensiá lo evaluá pashèntnan nobo na estado di FDL i determiná si nan ta pertenesé na e promé òf di dos liña, ku énfasis riba identifikashon trempan di riesgo i traspaso apropiá.
• Mehorashon di komunikashon i kolaborashon: lo promové un kolaborashon mas estrecho entre dòkternan di kas, parteranan i ginekólogonan, ku e meta di un traspaso ku ta fluí i kontinuidat di kuido pa hende muhénan na estado.
• Ahuste di e struktura di kompensashon: e struktura di kompensashon ta keda ahustá, di forma ku solamente partonan ku indikashon médiko komo kuido sekundario ta wòrdu kompensá, miéntras ku partonan primario sin nesesidat médiko ta risibí solamente kompensashon primario.
• Kampaña di konsientisashon nashonal di edukashon: lo lansa un programa di konsientisashon nashonal pa konsientisá hende muhénan na estado di uso adekuá di kuido opstétriko primario i sekundario, ku e meta pa mehorá e eskohonan i e desishon di e pashèntnan.
Un mihó sinkronisashon i un traspaso ku ta fluí entre kuido di promé liña i di dos liña ta esensial pa bienestar di mamanan i yunan. Ademas, e kordinashon di kuido entre e institutonnan aki ta kondusí na un eksperensia mas ágil i efisiente tantu pa pashèntnan komo pa dunadónan di kuido.
E maneho nobo pa kuido opstétriko na Kòrsou ta enfoká riba duna un sistema di kuido integrá i sentrá riba e pashènt ku ta kumpli ku e nesesidatnan i ekspektativanan di hende muhénan na estado i tambe pa mehorá kalidat, seguridat i efisiensia di kuido.
Pa mas informashon, tuma kontakto ku Ministerio di Salubridat Públiko, Medio Ambiente i Naturalesa.
639114718427035"
639114718427035"