Minister Pisas a instalá e promé aparato di midi CO2 na skol Joseph Civilis i despues a instalá na skol Johan van Walbeeck

Minister Pisas a instalá e promé aparato di midi CO2 na skol Joseph Civilis i despues a instalá na skol Johan van Walbeeck

Willemstad – Minister enkargá ku e sektor di Agrikultura, Medio Ambiente i Naturalesa, señor Gilmar Pisas, djabièrnè mainta a inisiá ofisialmente e proyekto piloto di maneho di kalidat di airu den klas lokalnan. E medio ambiente den un klas ku erko será ku hende aden ta diferente for di e medio ambiente den airu liber. Awendia tin aparatonan hopi sofestiká ku por midi eksaktamente konsentrashon di supstanshanan manera Dioxido di Karbono (CO2) den un lokalidat será kaminda tin hende. Esaki ta netamente ta meta di e proyekto piloto aki.

Nos ta inhalá Oxigeno i nos ta exhalá Dióxido di Karbono CO2. E situashon aki den airu liber no ta problema paso nos atmosfera i matanan ta absorbá e CO2. Pero den un lokalidat será, por sosodé un situashon kaminda e nivel di Dioxido di Karbono CO2 ta subi dimas. Esaki no ta un situashon ku ta hasi hende òf mucha malu paso ta trata aki di supstanshanan natural ku ta sali for di nos kurpa. Pero e por tin sierto efekto por ehèmpel, ku hende por mariá un tiki i kabishá durante lès. E nivelnan aki di CO2 no lo wòrdu alkansá fasilmente, pero e aparato ku ta midi esaki lo por konfirmá esei.

Minister Pisas den presensia di señora Selene Balentien i señora Patricia Maria di Ministerio di Enseñansa, maestronan, alumnonan di Jozef Sifilis i prensa a instalá e promé aparato ku ta midi CO2 na e skol. Despues a sigui ku skol Johan Van Walbeek kaminda tambe a instalá un aparato. For di e resultadonan lo por konkluí ku lokalidatnan ku erko kaminda muchanan ta haña lès lo mester implementá un maneho di ventilashon. Na Hulanda komo lokalnan na skolnan semper ta será pa motibu di frui, for di febrüari 2022 ta obligatorio tin un CO2 meter den tur lokal