STÒPMENTU DI PROSESAMENTU I ALMASENAMENTU DI KARTON RESIDUAL NA SANS SOUCI
Minister Javier Silvania
STÒPMENTU DI PROSESAMENTU I ALMASENAMENTU DI KARTON RESIDUAL NA SANS SOUCI
Minister di GMN a tuma nota di e molèster kousá pa un binienda na Sans Souci pa motibu di almasenamentu/transbordo di karton (residual). E habitante no tin pèrmit di molèster, asina yamá hindervergunning na hulandes, pa e aktividatnan akí. Ademas, e aktividatnan aki ta kousa molèster pa e habitantenan den besindario. Na 2021, tabatin asta un kandela kaminda gran parti di e depósito di karton a kima. Apesar di varios atvertensia i petishon di e Inspektor di Medio Ambiente i Naturalesa na e habitante pa e eliminá e residuonan di karton, esaki no a sosodé. Pa medio di un disposishon ministerial di 25 di sèptèmber 2023, Minister di GMN, a ordená e habitante e ora ei tambe, pa denter di término di dos siman stòp prosesamentu i almasenamentu di papel òf produktonan di esaki inkluyendo karton.
E habitante a bai korte i a pidi hues pa anulá e disposishon ministerial. Segun e habitante, su tata semper a dediká su mes na e aktividatnan aki, sin pèrmit, i e aktividatnan aki no ta kousa ningun molèster. Den un sentensia di ayera, hues a dikta ku e habitante ta aktuando den violashon ku e Ordenansa di Molèster (Hinderverordening) dor di hasi e aktividatnan aki sin pèrmit. Segun Tribunal, no tin perspektiva pa legalisashon di e situashon (ílisito i ilegal) aki i e medida ehekutá no ta desproporshonal.
Hues ta di opinion si ku mester bini un disposishon nobo kaminda ta indiká klaramente ku e Minister lo rekurí na medida di preshon atministrativo (bestuursdwang) si no eliminá e material di karton, i e término den kua lo e apliká esaki. E habitante a pidi hues pa e por kontinuá ku su trabou, pero hues a ninga. Al kontrario, segun korte, e habitante mester efektuá di antemano (i) e òrdu di Minister pa stòp prosesamentu i almasenamentu di karton residual di papel, inkluyendo stòpmentu di prosesamentu di karton i (ii) eliminashon di karton residual for di su tereno. Pues, e habitante no tin mag di kousa molèster mas na bisiñanan i hues tabata hopi kla tokante esaki.