E STRATEGIA CU TA HIBANDO PA COMBATI E VIRUS TA HIBA NOS PA LOGRA ‘CRUSH THE CURVE’ UN BIAHA MAS “Ta nos disciplina y cordialidad ta bay ta e yabi di nos exito den combati e virus aki”

REDAKSHON August 12, 2020 0 Comments

Prome Minister Evelyn Wever-Croes

E STRATEGIA CU TA HIBANDO PA COMBATI E VIRUS TA HIBA NOS PA LOGRA ‘CRUSH THE CURVE’ UN BIAHA MAS

“Ta nos disciplina y cordialidad ta bay ta e yabi di nos exito den combati e virus aki”

Siguiendo reglanan di precaucion despues cu su yiu a test positivo pa Covid, Prome Minister Evelyn Wever-Croes tawata den conferencia di prensa dialuna anochi for di un diferente localidad pa sigui duna ultimo informacionnan tocante desaroyo di Covid-19.

Prome Minister a remarca cu Aruba ta pasando den dianan hopi na unda cu diamars atardi Aruba a yega un total di 600 caso positivo di Covid. Un aumento drastico pero tambe ya a cuminsa mira cu e cantidadnan nobo pa dia ta varia bou di 100 caso nobo.

Siman pasa, despues cu 8 caso nobo a wordo raporta, Crisis Team a tuma decisionnan di biaha y precaucionnan importante pa asina mitiga e plamamento di e virus. Un dia despues e cantidad a subi cu 39 caso nobo riba un dia. Esaki ya caba tawata considera hopi y motibo pa precaucion pero e siguiente dia 92 caso nobo a wordo raporta y pa diabierna e cantidad pa dia a crece cu 133 caso nobo den un solo dia. Diasabra e cantidad a cuminsa baha na 113 y pa diadomingo e tawata na 54 caso, dialuna tawatin 67 caso y diamars un total di 87 caso nobo.

E peek grandi di fin di siman a cuminsa baha y esey ta tambe e meta na unda ta hibando un strategia pa logra baha e total di casonan nobo pa dia. Unabes cu esaki wordo logra, lo percura pa yuda tur persona infecta pa nan recupera y asina un biaha mas logra ‘crush the curve’.

“Nos a haci’e un biaha caba, nos por haci’e un biaha mas. Ta hopi importante den e fase aki pa comparti mas tanto informacion cu ta posibel cu henter comunidad di Aruba. Corda cu ta nos disciplina y cordialidad ta bay ta e yabi di nos exito den combati e virus aki”, Prome Minister a enfatisa.