Prosedimentu relashoná ku manifestashon.

KOMUNIKADO DI PRENSA
303 / 2020
11 ougùstùs 2020
Prosedimentu relashoná ku manifestashon.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Konforme tratadonan internashonal, tur persona tin derechi di manifestá.
Sinembargo, pa Kòrsou ta eksistí un ordenansa di manifestashon (A.B. 2010 no. 87), ku ta
regla ku esun ku ke tene entre otro un manifestashon na un sitio públiko, mester duna esaki
di konosé por eskrito na Minister di Hustisia, minimal 48 ora promé ku e manifestashon
tuma lugá.
Esun ku a mèldu e manifestashon na minister, lo risibí un dekreto ministerial den kua tin
entre otro fecha i orario ku el a mèldu esaki.
Esaki ta nifiká, ku no por ta asina, ku un manifestashon no tin un persona ku ta responsabel
pa esaki òf ku tur hende den e manifestashon ta lider di e aktividat.
Semper e minister en kestion por para un manifestashon, pa protekshon di salubridat, na
interes di tráfiko òf si e ta promové desòrdu.
Durante di e manifestashon no ta permití tampoko pa partisipantenan kana ku maskarada,
kara tapá ku paña i/o otro ophetonan ni tampoko disfrasá.
Bou di ningun kondishon ta aseptá ku siudadanonan ta pasa dor di bareranan ku polis pone,
sea den kuadro di seguridat, mantenshon di òrdu públiko, investigashon òf kualke otro
motibu ku na huisio di polis no por subi e área ei.
Polis ta bolbe enfatisá, ku tur persona inkluso esnan ku ta partisipá na manifestashon,
mester sigui tur òrdu i instrukshon duna dor di polis inmediatamente i puntualmente.
Polis despues di e alerta aki, lo bai aktua kontra tur esnan ku ta tene manifestashon i no ta
kumpli ku e eksigensianan ariba menshoná, strobando kontinuidat normal di e bida diario
riba nos isla.