Minister Hato ta tuma nota di plan di renobashon di Korte di Hustisia na Punda
Kòrsou, 22 aprel 2024
Minister di Hustisia mr. Shalten Hato, djaluna mainta tabata di bishitá na Kas di
Korte na Kaminda Dominico “Don” Martina riba invitashon di Presidente di Hof, mr.
Mauritsz de Kort i e direktor Martin Luttge pa tuma nota di e plan preliminar di
renobashon di Kas di Korte na Wilhelminaplein, Punda. Kas di Korte for di aña 2020
a muda pa e edifisio di èks KPMG pa por a inisiá ku trabounan di renobashon na e
edifisio na Punda. E edifisio di Korte na Punda ta 151 aña bieu i ta pertenesé na nos
lista di edifisionan monumental protehá riba lista di Unesco. Esaki a pone ku pa
renobashon di un edifisio di e índole aki, mester tene kuenta ku muchu mas detaye i
aspekto di infrastruktura na momentu di renobashon.
Den kuadro di esaki, mr. De Kort i sr. Luttge a presentá na Minister Shalten Hato e
plan di renobashon preliminar i tambe un diseño nobo preliminar ku lo kier
implementá na e edifisio den Punda pa kumplí ku e tempu aktual. Durante di e
presentashon a mustra tambe riba un lugá di parker komo pensamentu na e edifisio
nobo, pa asina por akomodá i fasilitá parkermentu di e personal di Korte i tambe pa
públiko ku ta presentá na kasonan den Korte. Tambe den e plan a presentá
proposishon pa ampliá e kantidat di sala pa kasonan di Korte kual lo bai brinda un
total di 7 sala den e plannan preliminar nobo.
Durante presentashon di sr. De Kort, e la spliká mas aleu ku e konstrukshon i
renobashon lo bai impliká algun kambio tambe den e struktura aktual pa e edifisio di
Parlamento di Kòrsou i ku netamente nan lo bai sinta ku Parlamento pa e
kolaborashon aki, saliendo for di e punto di bista ku nan tambe lo keda usa e
fasilidatnan aktual. E intenshon ta pa sinta ku e komishon di parlamento di Kòrsou
pa atendé e desaroyo i proposishon nan ku tin riba mesa. Sr. de Kort i Luttge a indiká
ku nan lo kier kuminsá ku e desaroyo nan i renobashon di e edifisio den Punda for di
e aña aki mes. Ta premirá ku e promé fase lo dura 2 aña pa renobashon di e edifisio
aktual i despues e ehekushon di e plan kompletu lo konkretisá despues di 4 aña.
Di parti di Minister Hato, e tabata satisfecho ku e plan ku a ser presentá di parti di
Hof i tambe e presentashon di e diseño aktual pa renobashon di e edifisio na Punda.





