MINISTER ORNELIO “KID” MARTINA TA LANSA PROGRAMA DI ESTUDIO, ENTRENASHON I DESAROYO PA HINTER GOBIÈRNU

WILLEMSTAD — Dia 22 di aprel 2024, Minister Ornelio “Kid” Martina den presensia di Minister di Desaroyo Ekonómiko, Ruisandro Cijntje, sekretarionan-general i ámtenarnan di diferente ministerio, a duna inisio di forma ofisial na e Government Academy, e programa di estudio, entrenamentu i desaroyo pa Gobièrnu. Sin importá funshon òf posishon, e programa di estudio, entrenamentu i desaroyo lo duna tur ámtenar e oportunidat pa desaroyá nan talento i konosementu. Pa selebrá lansamentu ofisial di e Programa di estudio, entrenamentu i desaroyo, a organisá 6 tayer éksitoso ku a konta ku partisipashon di ámtenar di diferente ministerio di Gobièrnu.

Vishon di e Government Academy ta pa ofresé un struktura di entrenamentu duradero ku ta kuadra ku e nesesidatnan di ministerionan i di e ámtenar. Tur ámtenar lo por sigui training di kalidat i atkerí konosementu i abilidatnan nobo pa medio di tayer, estudionan akreditá i tambe via di un plataforma di ‘e-learning.’ Ku lansamentu di e programa, Gobièrnu di Kòrsou ta duna prioridat na kresementu personal i profeshonal di nos aparato públiko.

E Government Academy ta basá riba 3 pilá di aktividat. E promé pilá yama “Gobièrnu ta NOS”, ku ta referí na programa di konosementu básiko pa forma ámtenar kompetente ku un sentido komun di responsabilidat. E di dos pilá yama “Gobièrnu ta ABO”, ku ta referí na estudio i entrenamentu pa profundisá konosementu den funshonnan ku tin den tur ministerio, por ehèmpel e funshon hurídiko, rekurso humano, komunikashon, IT, servisio na kliente,ets. E di tres pilá yama Gobièrnu ta AMI, ku ta enfoká riba e ámtenar su desaroyo personal i bienestar.

E departamentu di rekurso humano di Gobièrnu (HRO) a desaroyá e maneho i programa di entrenamentu i desaroyo den estrecho kolaborashon ku SOAB Learning Lab. HRO i SOAB Learning Lab lo forma huntu un unidat ku lo ta enkargá ku kordinashon, planifikashon i evaluashon pa asegurá un implementashon efikas i efektivo.

Gobièrnu ta komprometé pa sigui invertí den ekspertisio di tur empleado públiko, no solamente pa fortifiká abilidatnan profeshonal, pero tambe pa brinda espasio pa desaroyo personal, kresementu i bienestar.

———————————————