GOBIÈRNU DI KÒRSOU A RISIBÍ E VISE PRESIDENTE I  GERENTE GENERAL DI DUTCH CARIBBEAN NETWORKS (FLOW).

GOBIÈRNU DI KÒRSOU A RISIBÍ E VISE PRESIDENTE I 

GERENTE GENERAL DI DUTCH CARIBBEAN NETWORKS (FLOW).

 

Willemstad – Minister di Desaroyo Sosial, Labor i Bienestar Ruthmilda Larmonie-Cecilia, Minister di Desaroyo Ekonómiko Ruisandro Cijntje, i Minister di Maneho di Gobernashon, Planifikashon i Servisio Públiko Ornelio Martina, na nòmber di Gobièrnu di Kòrsou, a risibí e vise presidente i gerente general di Dutch Caribbean Networks (Flow) sr. Philip Anthony Matthews dia 15 di febrüari 2022 na Fòrti.

 

Minister Ruthmilda Larmonie-Cecilia tabata esun ku a guiá e reunion, debi ku Promé Minister Gilmar Pisas tabata presente den un reunion na Parlamento di Kòrsou.

 

E ministernan a risibí un presentashon amplio riba tur loke e kompania aki ta hasi aktualmente na Kòrsou, kua ta tur e adaptashonnan ku nan a bini ta hasi pa drecha nan servisionan i kua ta e proyektonan ku nan ke sigui hasi na benefisio di Kòrsou.

Tabatin diferente pregunta ku a bini dilanti di parti di e ministernan ku tabata presesente pa ku e servisio ku ta keda duná pa Flow i tambe kua ta tur e kambionan positivo ku Kòrsou por spera mas pronto ku ta posibel di parti Flow.

Di parti di Flow a splika kiko tur ku ta hasiendo pa nan por sigui brinda un bon servisio na nan usuarionan di Kòrsou.

 

A elaborá tambe riba e proyekto di kamaranan ku ainda mester keda finalisá.

E representantenan di e kompania ta na mesa ku e representantenan di Ministerio di Hustisia pa kaba di atendé e asuntu aki.

 

E reunion a kana den un bon esfera i sr. Matthews a gradisí e ministernan ku tabata presente pa a skucha i tuma nota di tur loke e kompania ta hasiendo i ke keda hasi pa Kòrsou.

Minister Larmonie-Cecilia a gradisí sr. Matthews, na nòmber di Gobièrnu di Kòrsou, pa tur informashon ku nan a risibí.