Animashon di Play Band, Caribbean Courage, Gino Coelho i Doble R Puru:

Dia di Rei na Renaissance Mall & Rif Fort

 

WILLEMSTAD – Kòrsou ta klá pa selebrá un otro Dia di Rei i Renaissance Mall & Rif Fort a prepará den grandi atrobe! E ambiente lo tuma lugá riba djasabra dia 27 di Aprel rònt di e fòntein, e área di hotèl i den Rif Fort. Bishitantenan lo disfrutá di e bazar tradishonal, ku un bes mas lo ta hopi variá. E aña aki lo ofresé mas ku 50 stènt di e.o joya trahá na man, ‘bijouterie’, artesania, produktonan natural, kos di boka dushi i hopi mas.  Tambe, lo tin un área spesial ku entretenimentu pa mucha inkluyendo Snapology ku ‘robòt i lego’ i wega pa esnan mas chikí. Pintamentu di kara, obra di man i arte, presentashon teatral pa mucha i bouncers. Bou di guia profeshonal bo por partisipá na pintamentu di un canva òf laga un artista dibuhá un potrèt di bo òf di bo yunan.  Lo tin un ekshibishon di outonan Wabi i presentashon di Caribbean Courage, Dj Con Clase i Play Band.

 

E selebrashon Dia di Rei na Renaissance Mall & Rif Fort lo ta for di 10:00 AM  pa 11:00 PM. No lubidá ku e shopnan lo ta abri ofresiendo ofertanan di Rei di kita “korona”! Nos restorant i barnan den Rif Fort tei ku nan kumindanan delisioso i spesial pa dia di Rei. Tambe lo tin un food court ku entre otro un bbq delisioso. Durante dia 88 Rock Kòrsou lo transmití live for di Renaissance Mall te den bo kas. “Spot the King or Queen, saka un potrèt i pasa na e booth pa kolektá un voucher ku un number. Hinka e number den e safe i bo tin chèns di gana vários premio entre otro 1 Weekend Stay na Renaissance Wind Creek Curaçao Resort.  Mas anochi tin un ambiente tur afó den Rif Fort ku animashon di Caribbean Courage, Gino Coelho i DJ Con Clase!

 

E aña aki tambe lo tin e Pre-Kings Day  Fiesta dia 26 di April!

Bishitantenan lo disfrutá di un fiesta total. Lo tin músika ‘live’ na 5’ O clock Somewhere Bar & Grill for di 7’or pa 10’or di anochi ku Play Band. Entre 9:00 PM te ku 12:00 AM. Doble R Puru huntu ku DJ Con Clase lo ta riba esenario di Rif Fort pa ofresé un konsierto baliabel GRÁTIS. Naturalmente bishitantenan tin amplio variashon di restorant i ‘cocktail bar’ pa skohe for di dje durante di e Pre-Kings Day Fiesta den Rif Fort riba 26 di April. Tuma nota ku ta “first come, first serve” i lo sera porta si Rif Fort yena. No ta permití pa drenta ku bebida òf jùg. For di awor ta deseá henter pueblo di Kòrsou un felis Dia di Rei!