𝐉𝐮𝐬𝐭𝐢𝐭𝐢𝐞𝐞𝐥 𝐕𝐢𝐞𝐫𝐥𝐚𝐧𝐝𝐞𝐧𝐨𝐯𝐞𝐫𝐥𝐞𝐠 𝐭𝐚 𝐟𝐨𝐫𝐭𝐚𝐥𝐞𝐬é 𝐤𝐨𝐥𝐚𝐛𝐨𝐫𝐚𝐬𝐡𝐨𝐧 𝐝𝐞𝐧 𝐑𝐞𝐢𝐧𝐨

𝐉𝐮𝐬𝐭𝐢𝐭𝐢𝐞𝐞𝐥 𝐕𝐢𝐞𝐫𝐥𝐚𝐧𝐝𝐞𝐧𝐨𝐯𝐞𝐫𝐥𝐞𝐠 𝐭𝐚 𝐟𝐨𝐫𝐭𝐚𝐥𝐞𝐬é 𝐤𝐨𝐥𝐚𝐛𝐨𝐫𝐚𝐬𝐡𝐨𝐧 𝐝𝐞𝐧 𝐑𝐞𝐢𝐧𝐨

E Ministernan di Hustisia di Kòrsou, Aruba, Sint Maarten i Hulanda a papia durante e Justitieel Vierlandenoverleg (JVO) na Kòrsou tokante diferente tema hudisial di interes komun i pa fortalese e forsa di kolaborashon den Reino.

Durante e deliberashon, entre otro, e siguiente temanan a bin dilanti:

• Kombatimentu di droga: Wardakosta a presentá e desaroyonan resien relashoná ku intersepshon di droga i migrashon.

• Kriminalidat hubenil: E kuater paisnan a bai di akuerdo pa organisá huntu un kongreso akadémiko tokante prevenshon i abordahe di kriminalidat hubenil, kaminda lo sigui traha riba e inisiativanan ku ya ta eksistí den e diferente paisnan.

• Kriminalidat organisá i debilitamentu di strukturanan públiko: E paisnan ta kontinuá ku nan kolaborashon den e abordahe atministrativo di ondermijning, ku énfasis, entre otro, riba fortalesementu di e bista general di kriminalidat i envolvimentu di partnernan nashonal relevante.

• Fluhonan internashonal di droga: Un investigashon tokante entrada di droga na Hulanda ta konfirmá ku e paisnan Karibense di Reino no ta pertenesé na e sinku prinsipal paisnan di tránsito pa kokaina ku destinashon Hulanda. Esaki ta kontribuí na un imágen mas balansá di nan posishon den e fluhonan internashonal di droga.

• Kapasidat hudisial: E Justitiële disbalansmonitor ta duna e paisnan un mihó bista riba e kapasidat disponibel i kapasidat nesesario pa por implementá akuerdonan di kolaborashon den e kadena hudisial na tempu i di forma efektivo.

• Kombatimentu di desaster i maneho di krísis: E akuerdo di kolaborashon CAS BES riba tereno di brantwer, kombatimentu di desaster i maneho di krísis lo ser prolongá ku tres aña.

Durante e reunion, a firma tres dokumento:

1. E lista di desishonnan di Justitieel Vierlandenoverleg;

2. E desishon di modifikashon di e Protokòl pa abordahe atministrativo di ondermijning;

3. E prolongashon di e Akuerdo di Kolaborashon Brantwer CAS BES.

Ku e akuerdonan i firmamentu di e dokumentonan aki, Kòrsou, Aruba, Sint Maarten i Hulanda ta reafirmá nan kompromiso konhunto pa un kolaborashon efektivo i duradero riba tereno di hustisia, mantenshon di lei i seguridat den Reino.

E próksimo Justitieel Vierlandenoverleg lo tuma lugá na yüni 2027 na Boneiru.