Prome Minister di Aruba, Mike Eman, y Prome Minister di Corsou, Gilmar Pisas, a intercambia punto di bista tocante diferente tema di interes comun, cu enfasis riba fortalecemento di e relacion bilateral, cooperacion regional y creacion di oportunidadnan concreto pa bienestar di e pueblo di ambos pais.
Durante su bishita na Corsou, Prome Minister di Aruba, Mike Eman, y Prome Minister di Corsou, Gilmar Pisas, a intercambia punto di bista tocante diferente tema di interes comun, cu enfasis riba fortalecemento di e relacion bilateral, cooperacion regional y creacion di oportunidadnan concreto pa bienestar di e pueblo di ambos pais. E bishita di Prome Minister Eman, riba invitacion di Prome Minister Pisas, ta den cuadro di celebracion di 16 aña di autonomia di Corsou y e encuentro regional Caribbean United in Excellence, cu ta reuni lidernan di region pa promove cooperacion y desaroyo den Caribe. Durante e encuentronan, ambos Prome Minister a reafirma e lasonan historico y estrecho entre Aruba y Corsou como dos pais autonomo den Reino Hulandes. Nan a destaca e importancia di sigui traha hunto, comparti conocemento y probecha e fortalesanan di cada pais pa crea oportunidad nobo pa desaroyo economico sostenibel. Na Banco Central di Corsou y Sint Maarten riba Dia di Corsou a tene un lunch pa tur e delegacionnan presente. Aki a uza e oportunidad pa oficialmente anuncia diferente punto den comun cu e islanan lo busca pa sigui fortalece e lasonan. E merdia a conclui tambe cu entrega di regalo na tur hefe di delegacion, simbolo di hermandad cu tin entre e nacionnan Caribeño. Presente durante e lunch tabatin tambe ex-mandatario e.o. Emily de Jongh Elhage, ministernan di Gabinete Pisas III , varios miembro di parlamento como tambe e cuerpo consular estableci na Corsou.
Cooperacion den diferente sector di importancia
Entre Corsou y Aruba un parti importante di e dialogo a concentra riba e posibilidadnan di cooperacion den sector di turismo, incluyendo innovacion, promocion di Aruba y Corsou como destinacion turistico combina y capacitacion di personal profesional y tecnico den sector di hospitalidad. Ademas, ambos Prome Minister a intercambia idea tocante aviacion y conectividad aereo, energia renobabel, modernisacion di e servicionan publico esencial, educacion, capacitacion profesional, comercio y logistica. E intencion ta pa identifica e oportunidadnan den cual ambos pais por complementa otro, comparti experiencia y desaroya iniciativa cu por contribui na un economia mas fuerte y resistente.
Desaroyo economico mester traduci den bienestar pa pueblo
Un di e puntonan central di e dialogo tabata e principio di Bon Comun “Common Good”, cu ta pone bienestar, dignidad y felicidad di e pueblo como prioridad. Ambos Prome Minister a comparti e vision cu crecimiento economico, inversion y prosperidad no mester keda limita na cifra economico, sino cu e progreso aki mester refleha den un miho calidad di bida pa tur ciudadano. Den e contexto aki, nan a destaca e importancia di crea un comunidad inclusivo, fuerte y solidario, caminda oportunidad economico ta bay man den man cu bienestar social, proteccion di medio ambiente y un sentido fuerte di pertenencia.
E vision aki ta pone e ciudadano central den desaroyo di pais, reconociendo cu progreso berdadero mester refleha den e oportunidadnan y bienestar pa cada famia por gosa den nan bida diario.
Fortalece posicion di islanan den contexto internacional
Otro tema cu a haya atencion durante e dialogo ta e iniciativa Sub-National Island Jurisdictions, cu ta busca mas reconocimento internacional pa e desafionan particular y necesidad di resiliencia di islanan cu no ta un estado soberano. E iniciativa aki ta enfoca riba e vulnerabilidadnan specifico di e islanan y e importancia di fortalece nan capacidad pa enfrenta desafio, respetando completamente nan posicion constitucional. Riba nivel regional, ambos Prome Minister a reafirma e importancia di cooperacion cu ta complementa e institucionnan y mecanismonan regional existente. Nan a reconoce e balor di intercambio di conocemento, cooperacion entre sector publico y priva y e oportunidadnan pa desaroya cadenanan di balor regional, teniendo na cuenta e prioridadnan y circunstancianan di cada pais.
Di dialogo pa accion concreto
Aruba y Corsou a expresa nan intencion pa sigui duna contenido concreto na e cooperacion bilateral. Den e cuadro aki, ambos Prome Minister a discuti e posibilidad di designa algun persona di contacto den cada pais, cu por contribui na elaboracion di un agenda practico di seguimiento pa e temanan di interes comun. E iniciativanan specifico lo mester wordo desaroya via e instancianan competente, conforme e procedimentonan y aprobacionnan necesario di cada pais.
E dialogo entre Prome Minister Mike Eman y Prome Minister Gilmar Pisas ta refleha e intencion comparti pa sigui fortalece e relacion entre Aruba y Corsou, amplia cooperacion y crea oportunidad cu por beneficia ambos pais. Caribbean United in Excellence ta sirbi como base, caminda e enfasis ta riba conecta e fortalesanan, comparti talento y crea oportunidad pa desaroyo y bienestar comun.
639114718427035"
639114718427035"