INFORMASHON DI EFO 2024

WILLEMSTAD – Djamars 30 di aprel 2024 e temporada di Prueba Final di Enseñansa di Fundeshi 2024 ta kuminsá pa 1667 (2023: 1696) alumno na Kòrsou. Sentro di Ekspertisia pa Prueba & Èksamen, un organisashon ehekutivo denter di ministerio di Enseñansa, Siensia, Kultura i Deporte, ta responsabel pa e.o. konstrukshon, produkshon, distribushon i korekshon di e prueba final di Enseñansa di Fundeshi. E aña akí lo ta e di 14 biaha ku e prueba akí ta tuma lugá. E dianan ku e Prueba Final di Enseñansa di Fundeshi ta tuma lugá ta: 30 di aprel, 2, 3, 7 i 8 mei 2024.

Kantidat di skol EFO 2024

E aña akí na Kòrsou un total di 52 skol ku 83 klas ta partisipá na e Prueba Final di Enseñansa di Fundeshi 2024. E alumnonan ku ta partisipá na e prueba final ta di diferente skol repartí bou di shete direktiva di skol regular i tres privá. E Prueba Final di Enseñansa di Fundeshi 2024 ku ta tèst tres materia tin un total di 270 item:

1. Papiamentu tin 90 item repartí entre ortografia, vokabulario i teksto.
2. Hulandes tin 90 item repartí entre spelling (ortografia), woordenschat (vokabulario) i begrijpend lezen (teksto).
3. Aritmétika/Matemátika tin 90 item repartí entre abilidat & operashon, midimentu, plaka, tempu & geometria i proporshon, frakshon, porshento & number ku kòma.
4. Pa tur parti di e prueba final ta usa pregunta di selekshon múltiple (multiple choice ku opshon di kontesta A-B-C-D).

 Idioma di instrukshon hulandes òf papiamentu

Pa e parti di Aritmétika/Matemátika skol tin e opshon pa laga nan alumnonan traha e parti akí sea na hulandes òf na papiamentu, esaki dependiendo di e idioma di instrukshon ku e skol ta usa. Di e 1667 alumnonan na Kòrsou 1595 alumno ta traha e parti di Aritmétika/Matemátika na hulandes i 72 alumnonan ta traha esaki na papiamentu. E 72 alumnonan ta repartí bou di 4 skol. E konstrukshon di e Prueba Final ta tuma lugá kuidadosamente i minisiosamente a base di kriterionan di kalidat. E Prueba Final ta basá riba e métanan núkleo di Enseñansa di Fundeshi stipulá pa minister di Enseñansa, Siensia, Kultura i Deporte.

Resultado Prueba Final Enseñansa di Fundeshi 2024

Sentro di Ekspertisia pa Prueba & Èksamen ta karga e responsabilidat di prosesá i raportá na direktivanan di skol e resultado ku kada alumno a optené pa e prueba final. Sinembargo, e konseho final tokante kontinuashon di enseñansa sekundario i e forma ku ta yega na e konseho akí ta prerogativa di direktivanan di skol. Ta entregá e resultado di e Prueba Final di Enseñansa di Fundeshi den e di dos siman di yüni 2024 na direktivanan di skol.

Minister di Enseñansa, Siensia, Kultura i Deporte  Sr. Sithree van Heydoorn i e tim di Sentro di Ekspertisia pa Prueba & Èksamen ta deseá tur alumno di grupo 8 di FO éksito ku e klousura di e aña eskolar.

—

KOMUNIKASHON