Karta di Frakshon di Partido Man pa Minister di Finansas.

Miembro di Partlamento pa MAN Dr. Steven Martina a dirigí varios pregunta na
Minister di Finansas relashoná ku Ennia. Den e karta Parlamentario Martina ta hasi
varios pregunta ku mester trese mas klaridat riba e forma kon ta bai implementá e
“Hoofdlijnen akkoord Resolutie Ennia”.
Dia 29 febrüari 2024 último parlamento ku un gran mayoria atrabes di un moshón a
sostené kontenido di e “Hoofdlijnen akkoord Resolutie Ennia”. Resientemente nos a
tuma nota tambe ku Gobièrnunan di Kòrsou i St. Maarten i tambe CBCS a yega na
un akuerdo i a formalisá e “Hooflijnen akkoord Resolutie Ennia” pa garantisá
penshonadonan di Ennia Leven nan penshun i tambe trahadornan di Ennia nan
trabou ku e “doorstart” di Ennia Leven. Di un banda nos ta kontentu ku tin solushón
riba mesa. Di otro banda nos ta lamentá inmensamente ku al final ta pueblo di
Kòrsou ta paga e preis pa e solushón aki dor ku pa 30 aña largu Gobièrnu atrabes di
su presupuesto lo aportá ku 30 mion pa aña i CBCS lo aportá ku 15 mion pa aña. E
45 mion pa aña lo no por keda destiná pa otro finnan manera, kombatí probresa,
enseñansa, deporte, kultura, bario, infrastuktura, etc. Ta pesei ta di suma
importansha ku lokual a sosedé ku Ennia, hamas i nunka lo ripití. Ta di sumo
importansha tambe pa nos komo parlamentarionan por splika pueblo di Kòsou, kiko
a sosodé, unda tabatin fayo, kon lo remediá esakinan, i kiko ta hasi pa evitá ku esaki
por sosodé atrobe den futuro. Mester restablesé konfiansa di pueblo den su
institutonan manera Fondonan di Penshun, Kompanian di seguro di bida i CBCS.
Sigur si nos tuma na konsiderashon e lei pa penshun general obligatorio pa trahadó
ku ta den proseso di tratamentu. Ta nifiká ku nos lo yega na un situashon ku kada
trahadó lo kontribuí na su penshun. Ta importante ku tin “peace of mind” ku nos
institutonan ta funshoná i e sennan ku ta keda di spar i inbertí lo no keda malusá pa
otro finnan. Den e kuadro aki Frakshon di MAN ke hasi algun pregunta aklaratorio.
Hasiendo uso di e derecho di hasi pregunta manera stipulá den artíkulo 96 di
Reglamento di Orden i tambe artíkulo 57 di Areglo di Estado, suskrito ta hasi na
Minister e siguiente preguntanan:
1. Pa lokual ta trata e tema di Ennia, kiko a bai robes?
2. CBCS no tabata na altura ku ta sakando hopi sèn te ku a saka sèn di mas for di
Ennia?
3. CBCS no tin un prosedura ku mester kumpli kuné prome ku saka sèn for di e
kompania ?
E prosedura aki a funshoná ?

4. Hunta di komisario no mester a “trek aan de bel” na momentu ku konstatá ku e
forma ku ta saka sèn for di Ennia i aloká esaki na inbershonnan ta violá e kriterionan
di solvabilidat di CBCS?
5. Ki lès mester siña for di lokual a sosodé na Ennia?
6. Kua ta e pasonan konkreto ku Minister a tuma i ta bai tuma pa evitá ku lokual a
sosodé
na Ennia lo por repití ?
7. Kiko por informá, splika i aklará na e pueblo di Kòrsou en general i esnan ku ta
spar pa nan penshun en partikular pa restablesé konfiansa den nos institutonan
finansiero i CBCS ?
Gustosamente lo nos ke risibí kontesta riba e preguntanan aki, pa asina suskritonan
por sigui atendé e tópiko aki. Sperando riba un kontesta ku e rapides nesesario,
suskritonan ta keda.
Asina e karta di Parlamentario Martina a finalisá.

Steven Martina