Konseho di Minister ta urgi pa hasi listanan di espera mas kòrtiku promé ku oumento di Norma di Salarionan Máksimo (LNT) pa spesialistanan médiko

Minister di Salú Públiko, Medio Ambiente i Naturalesa (GMN) a instalá un grupo di trabou, yamá “Werkgroep ter waarborging toekomst Curaçao Medical Center (CMC)”. E grupo di trabou aki, ku ta konsistí di representantenan di e asosiashon di spesialistanan médiko, Banko di Seguro Sosial, Inspekshon di Salú Públiko i Ministerio di Finansa, ta enkargá ku dunamentu di konseho na Minister di GMN tokante (i) salario di spesialistanan médiko bou di e Ordenansa Nashonal di Regulashon di Salarionan Máksimo (Landsverordening Normering topinkomens – LNT) i si modifikashon di esaki ta deseabel i posibel, (ii) e posibilidatnan pa hasi e sektor médiko mas atraktivo pa spesialistanan médiko ku ta laborando i pa e spesialistanan médiko yu di Kòrsou ku ta deseá di bin kas bèk i (iii) e posibel fasilidatnan fiskal pa spesialistanan médiko.

E promé produkto entregá na minister dor di e grupo di trabou, ta e dokumento pa oumento di e norma di LNT pa spesialistanan médiko. E produkto aki a keda presentá na Konseho di Minister dia 24 di aprel 2024 pa konsulta. Despues di konsulta Konseho di Minister a manda e dokumento bèk pa Minister di GMN, pa sigui elaborá e proposishon mas aleu. Konseho di Minister a pidi Minister di GMN pa añadí medidanan proponé pa balansá e oumento di e norma di LNT na e dokumento. Tambe a proponé pa eksplorá introdukshon di un kompensashon di prestashon pa spesialistanan médiko komo insentivo pa oumento di produktividat. Komo kondishon pa oumento di e norma di LNT pa spesialistanan médiko, Konseho di Minister ta aksentuá ademas e nesesidat pa un solushon ku lo hiba na bahada di e lista di esperanan pa pashèntnan.

E listanan di espera di CMC ya pa largu tempu ta un punto di preokupashon. Esaki ta motibu pa kua e instituto a risibí un instrukshon (aanwijzing) den pasado di Inspekshon di Salú Públiko. Di akuerdo ku e instrukshon aki CMC mester re-dirigí pashèntnan na Advent Hòspital pa operashon na momentu ku na CMC mes no tin lugà. CMC a haña te fin di yüni 2024 pa eliminá e listanan di espera aki.

Den e periodo benidero, e grupo di trabou lo mester bai dirigí su mes riba presentashon di solushonnan pa hasi e listanan di espera eksistente pa pashèntnan mas kòrtiku. Despues lo presentá e dokumento di nobo na Konseho di Minister.