DRS. R. GOEDGEDRAG: INSPEKTOR GENERAL DI ENSEÑANSA

WILLEMSTAD – Resientemente a saka vakatura, i a kana e prosedura konforme lei, pa skohe e mihó kandidato pa e posishon di inspektor general di enseñansa pa Ministerio di Enseñansa, Siensia, Kultura i Deporte (ESKD). Minister di ESKD, sr. Sithree van Heydoorn, a informá personal di inspekshon di enseñansa ku a nombra sr. Raily Goedgedrag komo inspektor general di Inspekshon di Enseñansa Kòrsou.  

Drs. R. Goedgedrag no ta un deskonosí den e mundu di enseñansa na Kòrsou. For di aña 2014 e ta Inspektor di Enseñansa, i resientemente el a kumpli su di 10 aniversario den e funshon akí. Promé ku esei, durante e periodo di 2002 te ku 2014, el a laborá na entre otro Hogeschool Rotterdam, Servisio pa Asuntunan di Enseñansa (SAE), Akademia Pedagógiko Kòrsou i University of Curaçao. Tambe el a funda Mentoraat ANTUBA na Rotterdam i a inisiá e programa Subi Jet pa bo Get.  

Despues di a finalisá VWO na Maria Immaculata Lyceum na 1997, sr. Goedgedrag a migra pa Hulanda kaminda el a studia Pedagogia. E ta karga e título Master of Science despues di a finalisá Doctoraal Onderwijskunde na Rijksuniversiteit. Komo parti di su estudio, na aña 2001–2002, el a kore stazje na Departamento di Enseñansa di Antia Hulandes. Pa finalisá su estudio, el a hasi investigashon i a evaluá implementashon di formashon básiko na Antia Hulandes. Su tesina a karga e título Succesvol innoveren in de Nederlandse Antillen. Hoe effectief zijn wij bezig? Twee perspectieven op onderwijsinnovatie: denkkader voor de aanpak onderwijsvernieuwing. 

Resientemente el a finalisá Leergang Onderwijsrecht na VU Law Academy na Vrije Universiteit Amsterdam. Su tesina tabata titulá: Wetgeving op het toezicht op het secundair beroepsonderwijs in Curaçao, een noodzaak?  

Minister van Heydoorn ta sumamante kontentu ku nos inspektor general nobo ta un siudadano di Kòrsou bon prepará i kla pa sigui sirbi pais Kòrsou den enseñansa. 

— 

KOMUNIKASHON 

*Riba e potrètnan athunto por tuma nota di Minister van Heydoorn felisitando sr. Goedgedrag den presensia di sekretario general di ESKD, sra. Susan Larmonie-van Heydoorn, huntu ku parti di e tim di inspekshon.