Wer severo na Banda Bou 4 mei 2024.

Wer severo na Banda Bou 4 mei 2024.

Manera nos ta na altura, durante di mainta trempan di djasabra tabata tin áwaseru fuerte kompaña pa welek i bos den e área di Banda Bou.

Servisio Meteorológiko kier ekstendé palabra di konvivensia ku e famianan ku a haña daño durante di e mal tempu aki. Manera ya konosí, for di komienso di siman pasa Servisio Meteorológiko a indiká ku lo tin posibilidat pa áwaseru durante di fin di siman. Mas den transkurso di siman a kuminsá indiká via prensa i medionan sosial  ku lo por tin áwaseru fuerte kompania ku welek i bos durante fin di siman.

Manera pronostiká áwaseru a kuminsá kai for djabièrnè mainta pero mirando e kantidat di áwaseru no tabata tin motibu pa emití un atvertensia. Si a indiká djabièrnè mainta lo por tin áwaseru fuerte kompania ku welek i bos ku por kousa molèster den e próksimo 24 ora. Djasabra mardugá ora ta tin indikashon ku lo bai tin molèster na Banda Bou a saka kódigo hel 06:00 i despues 06:20 kódigo oraño pa Mal Tempu severo.

Segun último informashon ku Meteo ta dispone di dje ta ku e kantidat di áwaseru ku a kai na diferente lugá na Banda Bou tabata entre 06:00 a.m. pa 09:00 a.m. E yobida tabata fuerte ku un frekuensia alto di welek i bos. E wer radar a indiká ku e mal tempu mas pisa tabata entre di Landhuis Klein Santa Marta, Landhuis Santa Cruz i parti sùit di e parke Christof. E stashon di Soto a registrá un total di 310mm, esaki ta hopi mas tantu ku a kalkulá na promé instante mirando e dañonan. Na Savonet ku ta parti nort di e área a registrá apénas 17 mm i na aeropuerto Hato 29 mm.

E kantidat di áwaseru na Soto por igualá ku e kantidat ku a kai durante di pasashi di Tormenta Tropikal Tomas na aña 2010 (275mm).

Manera indiká anteriormente temperatura di laman den Karibe i Oséano Atlántiko, alabes presensia di e fenómeno La Niña den Oséano Pasífiko lo pone ku ta eksistí un mihó kondishon atmosfériko pa e sistemanan tropikal desaroyá den nos área.

Den e kuadro aki Servisio Meteorológiko Kòrsou, komo e instansia ofishal i responsabel pa vigilá situashonnan di tempu, duna konseho na Outoridatnan, lo emití atvertensia durante di mal tempu i posibel siklonan tropikal.  Meteo ta konsehá komunidat pa kuminsá tuma e pasonan nesesario pa por ta bon prepará pa e temporada di Orkan. Den e forma aki ora Meteo emitié un alerta por aktua ku fasilidat pa protehá bida i propiedat.

Servisio Meteorológiko Kòrsou ta sigui vigilá situashon di tempu den region Karibe.