Banco di Caribe ta felisitá Fundashon Bèti Doran ku eksitoso ‘Siman di Müzik pa Mucha 2024’
Banco di Caribe ta felisitá Fundashon Bèti Doran
ku eksitoso ‘Siman di Müzik pa Mucha 2024’
WILLEMSTAD: Resientemente Banco di Caribe a duna su sosten na Fundashon Bèti Doran pa realisá ‘Siman di Müzik pa Mucha 2024’. Ya ta pa algun aña konsekutivo ku Banco di Caribe ta duna su kontribushon na e siman den kual Fundashon Bèti Doran ta organisá diferente tayer musikal, ofresé músika bibu den bario i e aña aki tambe e obra musikal ‘Tula e Héroe’. Banco di Caribe ta masha orguyoso di por a forma parti di e siman importante aki den kual muchanan a eksperensiá músika di un manera edukativo, sosial i kultural.
Banco di Caribe a presensiá e.o e tayer di kuenta presentá pa Guinetta De Palm. Usando e lema “Lesa, skucha, gosa i biba un kuenta”, Sra. de Palm a kombiná kuenta i kanto pa tene e muchanan konektá i hasi e presentashon interaktivo. Miéntras ku Ike Jeserun a kompartí su konosementu amplio di müzik kultural ku e muchanan. E alumnonan di St. Albertus College a siña tokante Dansa, Seú, Tumba, Tambú i Djangue (Ritmo Indjan). Tambe, e muchanan a siña kon por usa instrumentonan pa toka diferente tipo di müzik. Mester bisa ku Ike Jeserun a krea un ambiente total durante e tayer kaminda e muchanan mes por a toka, baila i kanta.
Tambe, Fundashon Bèti Doran a duna skolnan oportunidat pa demostrá nan propio talentonan den diferente kompetensia. E aña aki Kolegio Iris Bruyning i St.Joris College ta esnan ku a resaltá den nan kompetensianan di kanto i obra di arte. Aparte di yuda Fundashon Bèti Doran realisá ‘Siman di Müzik pa Mucha’, Banco di Caribe a kontribuí pa skolnan ganador risibí un premio.
Resientemente, huntu ku Fundashon Bèti Doran, Banco di Caribe a bishitá e dos skolnan pa entregá e premionan, bon meresí na e alumnonan. Fundashon Bèti Doran por mira bèk riba un otro edishon masha eksitoso di ‘Siman di Müzik pa Mucha’ ku ademas tabata edukativo i tambe dibertido pa e muchanan. Banco di Caribe ta apresiá inisiativanan manera esaki ku ta kontribuí na e formashon di mucha- i hóbennan di Kòrsou. Riba e imágen por tuma nota di alumnonan durante tayernan musikal i entrega di premio na skolnan.
