Outoridatnan ku ta supervisá lucha kontra labamentu di plaka ta formalisá nan kolaborashon

No. 2024-015

Outoridatnan ku ta supervisá lucha kontra labamentu di plaka ta formalisá nan
kolaborashon
WILLEMSTAD—Centrale Bank van Curaçao en Sint Maarten (CBCS), Gaming Control Board (GCB) i
Financial Intelligence Unit (FIU) na Kòrsou ta sigui firme den nan lucha kontra labamentu di plaka,
finansiamentu di terorismo i proliferashon di arma di destrukshon masivo (AML/CFT/CFP). Pa
formalisá nan kolaborashon, e organisashonnan akí a firma un Memorandum of Understanding
Multilateral (MMoU) dia 10 di mei 2024.
CBCS, GCB i FIU ta e entidatnan responsabel pa supervisá ku e suministradónan di servisio ta kumpli ku
e stipulashonnan di Landsverordening melding ongebruikelijke transacties i Landsverordening
identificatie bij dienstverlening. Huntu, nan ta enfatisá e importansia di kumpli ku e normanan
internashonal relevante ku Financial Action Task Force (FATF) ta stipulá. Kooperashon, konsulta i
interkambio di informashon entre e instansianan menshoná lo yuda nan kumpli na un manera efektivo
ku nan tareanan di supervishon i inteligensia finansiero. Na final di kuenta, esei lo yuda fortifiká integridat
di e sistema finansiero na Kòrsou.
E Instansianan a bai di akuerdo pa formalisá nan relashon eksistente i basa nan kooperashon den e área
di supervishon di AML/CFT/CFP i di nan tareanan di inteligensia finansiero riba e prinsipio- i
prosedimentunan deskribí den e MMoU. E palabrashonnan fihá den e MMoU lo sirbi komo base pa un
kooperashon mas estrecho entre e Instansianan; unu fundá riba konfiansa i entendimentu mutuo.
Willemstad, 17 di mei 2024
CENTRALE BANK VAN CURAÇAO EN SINT MAARTEN
GAMING CONTROL BOARD
FINANCIAL INTELLIGENCE UNIT