TUR KOS TA PRAKTIKAMENTE KLA PA NOS SELEKSHON NASHONAL FEMENINO SENIOR SU PARTISIPASHON NA E CARIBBEAN QUEENS FRIENDLY MATCHES DI 28 DI MEI PA 3 YÜNI 2024 AKI NA KÒRSOU!
TUR KOS TA PRAKTIKAMENTE KLA PA NOS SELEKSHON NASHONAL FEMENINO SENIOR SU PARTISIPASHON NA E CARIBBEAN QUEENS FRIENDLY MATCHES DI 28 DI MEI PA 3 YÜNI 2024 AKI NA KÒRSOU!
Nos ta drentando e siman di e gran inisio di e Caribbean Queens Friendly Matches 2024 kaminda Kòrsou, Aruba i Trinidad & Tobago lo enfrentá otro di 28 di mei pa 3 di yüni próksimo den Stadion Rignaal ‘Jean’ Francisca.
Nos selekshon tin vários luna ta praktiká i preparando pa saka kara di Kòrsou. Un grupo di 22 hungadó ta forma parti di nos selekshon nashonal femenino senior. E hungadónan aki ta hungadónan áktivo di nos Kampionato Femenino pero tambe tin 8 hungadó residensiá den eksterior ku a bin pa reforsá nos selekshon.
Ayera ‘nochi 6 di nos 8 refuersonan a yega Kòrsou pa kontinuá ku e preparashonnan pa nos partido di djamars binidero kontra Aruba. Ta trata aki di Raëngelly Keller ku ta militá den VV Spirit, Rozan Snoek ku ta forma parti di WVHEDW, Jeleaugh Rosa ku ta hunga den MSV Duisburg, Lindsey Hart ku ta hungando den Excelsior Maassluis, Celainy Obispo di Feyenoord i Naychelene Nisia hungadó di Excelsior.
6 damita ku sigur lo duna un man pa fortalesé nos selekshon durante e partidonan aki. Den e dianan aki e delaster 2 refuersonan lo pisa suela di Kòrsou pa sigui prepará pa nos kompromisonan di e Caribbean Queens Friendly Matches 2024.
Karchinan pa e partidonan di Kòrsou ta kosta fl.10,- pa adulto miéntras mucha di 6 pa 12 aña i 60+ ta kosta fl.5,-. Tambe por kumpra un pakete di karchi ku tur e 4 weganan di Kòrsou na balor di fl.35,- pa adulto i fl.15,- pa mucha di 6 pa 12 aña i 60+. E karchinan lo ta disponibel na e lokètnan di stadion un ora promé ku kada partido inisiá.
E ora 0 ta yegando pa nos selekshon femenino senior su promé partido di e Caribbean Queens Friendly Matches 2024 ku lo tuma lugá di 28 di mei pa 3 di yüni 2024 aki na Kòrsou.
Un tabla lo bula den Stadion Rignaal ‘Jean’ Franciasca djamars 28 di mei ora Kòrsou enfrentá Aruba pa 7’or di anochi durante e inisio di e Caribbean Queens Friendly Matches 2024!
26 mei 2024
Keller, Snoek, Rosa, Hart, Obispo i Nisia kende ta e promé grupo di refuersonan ku a yega Kòrsou pa e partidonan aki