Ta bai eliminá retraso na UOJZ relashoná ku kasonan di alimentashon
Ta bai eliminá retraso na UOJZ relashoná ku kasonan di alimentashon
Djaluna 27 di Mei 2024 Minister di Hustisia, mr. Shalten Hato a reuní huntu ku direktor
interino di UOJZ, dekano di abogadonan, representante di Korte di Hustisia i
kolaboradornan di maneho di Ministerio di Hustisia pa atendé retrasonan ku tin na UOJZ ya
pa un kantidat di aña kaba. Tin diferente retraso ku a surgi atrabes di tempu relashoná ku
entre otro alimentashon, pero tambe diferente otro kasonan ku ta ser atendé riba e tereno di
famia.
Durante di e reunion djaluna mainta, Minister di Hustisia a tuma nota di vários kaso ku tin
retrasá i ku esakinan a akumulá na alrededor di 200 kaso. Mesora ku Minister Hato a skucha
di esaki, e la yama tur partido enbolbí na mesa pa trese klaridat i tambe pa atendé un
maneho pa e kasonan atrasá ku tin aki, i tambe kon lo atendé ku petishonnan nobo ku drenta
di forma diario.
Despues di a skucha di kada partido na mesa algun rekomendashonnan, Minister Shalten
Hato a indiká ku e proposishon a korto plaso di su banda lo ta, pa trese algun dia di
informashon na tur esnan ku di un òf otro manera nan petishon no a ser trata dentro di e
tempu stipulá. E persona(nan) aki, lo bai risibí informashon di parti di Departamentu UOJZ,
kon pa nan entregá nan petishon nan mes na Korte si e persona kier entregá e demanda e
mes, òf tambe kon e persona por haña splikashon kon pa yega na un abogado di Gobièrnu.
Durante e seshonnan di informashon nan lo risibí informashon kon pa yena di forma korekto
e demanda ku mester ser entrega na Korte.
Tambe lo splika e proseso pa asina e persona por bin na remarke pa un karchi di Gobièrnu
dado kaso e persona lo kier pa un abogado kompañé na Korte. Pues konkretamente ta bai tin
2 opshon den kual sea nan por risibí ayudo di personal di UOJZ pa por entregá e demanda
na korte òf ta guiá nan den e proseso pa yega na un abogado di Gobièrnu. Pa evitá ku e
petishonnan na UOJZ lo por akumulá, a start ku e proseso di reklutashon di personal tambe
pa e instituto, kual lo yuda pa atendé tur petishon diario i kumpli ku e demanda ku tin di
vários petishonnan ku ta risibí riba un base diario na e instituto.
Korte lo bai organisá algun dia speshal riba kua ta bai trata tur e kasonan aki. Korte di
Hustisia durante e reunion ku Minister di Hustisia a duna nan disponibilidat pa yuda den e
trayekto aki ku algun dia spesial a korto plaso, pa por tin tratamentu di e diferente kasonan,
kual lo yuda enormemente pa aselerá e proseso i asina eliminá e retraso aktual.
Denter di poko, tur persona ku tin retraso den e diferente kasonan aki, lo bai risibí un karta
unda nan lo mester registrá pa un seshon di informashon, pero tambe nan lo mester partisipá
na e seshonnan aki pa por yena nan aplikashon den e formato di korte òf tambe risibí mas
informashon di e trayekto ku UOJZ lo guia nan i informá nan di dje.
