Kòrsou TA bon representá na e di 4 konferensia pa SIDS na Antigua i barbuda
Kòrsou TA bon representá na e di 4 konferensia
pa SIDS na Antigua i barbuda
Willemstad – Despues di 10 aña e konferensia pa islanan SIDS4 (Small Island Developing States) a ranka sali na Antigua i Barbuda di 27 pa 30 di mei 2024.
Un delegashon di Kòrsou konsistiendo di Promé Minister sr. Gilmar Pisas i Minister di Desaroyo Ekonómiko sr. Ruisandro Cijntje, komo parti di delegashon di Reino Hulandes, ta na Antigua pa representá e interesnan di SIDS en general i di Kòrsou en partikular.
Meta di Promé Minister sr. Pisas su partisipashon ta pa presentá i sali na defensa di Kòrsou su interes, manehonan i posishonamentu riba tereno di impakto di kambio di klima, sostén finansiero, resiliensia klimátiko i tambe nos maneho i akshonan na nivel nashonal.
Promé Minister sr. Pisas lo trese algún ponensia dilanti den varios aktividat ku ta tuma lugá den kuadro di e konferensia i tambe e lo tene diferente kombersashon bilateral ku varios pais di nos región ku ta miembro di Caricom.
E meta pa topa ku diferente miembro di Caricom ta pa pidi nan sostén i kolaborashon pa nos miembresia asosiá na Caricom por tuma lugá eksitosamente.
Minister di Desaroyo Ekonómiko sr. Cijntje su partisipashon ta den kuadro di Kòrsou su interesnan den Desaroyo Ekonómiko Duradero i tambe Transishon Energétiko.
Minister sr. Cijntje lo partisipá na varios seshon ku tin di haber ku diversifikashon di ekonomia di SIDS i tambe lo partisipá na diferente aktividat kaminda e ta hiba palabra i vosiferá maneho, akshon i inisiativanan.
Na yegada sr. Promé Minister sr. Pisas a keda invitá na un resepshon serka e Gobernador General di Antigua i Barbuda sr. Rodney Williams i anochi a keda invitá pa un sena serka Promé Minister di Antigua i Barbuda sr. Gaston Browne.
Promé Minister sr. Pisas a tene reunion ku Sekretario General di Nashonan Uní Antonio Guterres, durante kua a atendé diferente punto di interés di e kuater paisnan ku ta den Reino.
Promé Minister sr. Pisas a topa ku Promé Minister di Guyana sr. Phillips, Sekretario General di CARICOM sra. Dr Carla Barnett, Minister di Planifikashon i Desaroyo di Trinidad i Tobago sra. Pennelope Beckles-Robinson, i Presidente di CAF (Development Bank of the Latin America and Caribbean) sr. Sergio Díaz-Granados Guida.
Promé Minister sr. Pisas a hasi apertura di e “side event” di Reino kual a keda organisá den kolaborashon ku Repúblika Dominikana i a hiba e tema di “Blue Resilience”.
Promé Minister sr. Pisas tabata un di e oradonan prinsipal na apertura di e “side event” di Island Innovation i Enviado Espesial di Islanan BES sr. Edison Reina.
Den e “side event” aki, Minister sr. Cijntje a lansa un inisiativa nobo pa forma un plataforma i fondo pa fasilitá islanan ku ta den un posishon konstitushonal di manera ku Kòrsou tambe por atendé ku resiliensia di un forma mas konsistente pa asina yega na mekanismonan pa finansiamentu, ya ku aktualmente nos no ta figurá komo paisnan den desaroyo i dor di esei no ta bin na remarke pa finansiamentu òf e fondonan ku ta disponibel.
Den e próksimo dianan tantu Promé Minister sr. Pisas komo Minister di Desaroyo Ekonómiko sr. Cijntje lo tin kombersashonan ku varios mandatario i lo ta den diferente seshon i panel pa vosiferá Kòrsou su desafío



































