Anunsio i Rekomendashonnan pa Evitá Transakshonnan Froudulento
Anunsio i Rekomendashonnan pa Evitá Transakshonnan Froudulento
Willemstad/Philipsburg – Centrale Bank van Curaçao en Sint Maarten (CBCS) ta emití un
anunsio vital pa tur konsumidó i negoshi tokante e riesgo di aktividatnan froudulento den
vários transakshon digital. E aktividat kriminal aki ta un menasa signifikante pa e stabilidat
finansiero i ekonómiko di nos komunidatnan, ya ku nan ta usa datonan hòrta pa hasi
transakshonnan no outorisá.
Aktividatnan froudulento den transakshonnan digital no solamente ta resultá den pèrdida
finansiero direkto pa konsumidó, sino tambe ta kousa rechaso di transakshon, tarifa haltu pa
reembolsá, i gastu adishonal pa komersiante. E tipo di aktividatnan aki ta komprometé e integridat
di nos sistema finansiero i por perturbá operashonnan legítimo di negoshinan miéntras ta debilitá
konfiansa di konsumidó den transakshon digital.
Medidanan di Protekshon Rekomendá pa Konsumidónan
Reakshonando riba e menasa kresiente di froude, CBCS ta konsehá ku énfasis pa konsumidónan
adoptá e siguiente medidanan di protekshon kontra transakshonnan froudulento:
Sea alerta
Loke por aparentá di ta un yamada òf e-mail legítimo di bo institushon finansiero, pidiendo bo pa
duna bo informashon personal (bankero), por ta un intento froudulento di un ‘hacker’. Tene na
kuenta ku ningun institushon finansiero lo pidi bo pa duna informashon sensitivo di e forma aki.
Tuma kontakto ku bo institushon finansiero si bo no ta sigur di e legitimidat di un hende ku a yama
òf e-mail.
Monitoreá bo Ekstraktonan Finansiero Regularmente
Detekshon tempran ta klave pa evitá mas uso inadekuá di bo informashon finansiero. Revisá bo
ekstraktonan (bankero) regularmente pa identifiká kualke transakshon no outorisá. Si bo nota un
pago no outorisá, tuma kontakto ku bo institushon finansiero inmediatamente.
Instalá Alerta pa Transakshon
Inskribí bo mes pa e servisio di alerta di transakshon di bo institushon finansiero. Risibí notifikashon
di SMS òf e-mail mesora tokante di kualkier aktividat riba bo kuenta por ta krusial pa detektá
transakshonnan froudulento na tempu.
Utilisá Métodonan di Pago Sigur
Outentikashon di dos paso (2FA): Aktivá 2FA riba tur kuenta online i plataformanan di kompra. Ku
implementashon di 2FA, lo bo mester kumpli ku un di dos método di outentikashon pa haña akseso
na bo kuenta, fuera di bo nòmber di usuario i kontraseña. Ehèmpelnan ta inkluí risibí un kódigo di
verifikashon via e-mail òf SMS, un skèn di bo dede, òf hasta un aplikashon spesial riba bo aparato.
Protokòlnan HTTPS: Sigurá ku kualke wèpsait ku bo hasi transakshon riba dje ta seif dor di chèk pa
‘HTTPS’ ta den e adrès di e wèpsait (URL), loke ta indiká un konekshon kodifiká. Por ehèmpel:
https://www.centralbank.cw.
Retnan Virtual Priva (VPN): Usa VPN pa akseso na internèt via ret Wifi públiko òf sin seguridat pa
protehá bo informashon personal i finansiero di kriminalnan sibernétiko. Un Ret Virtual Priva ta un
mekanismo ku ta duna un konekshon seif entre un aparato i un ret di kòmpiuter, òf entre dos ret.
Medidanan Rekomendá pa Negoshinan i Partnernan Teknológiko
Ta urgi komersiante i proveedor di servisio di pago pa implementá mekanismonan robusto pa
detekshon i prevenshon di froude. Funshonnan di seguridat manera Sistema di Verifikashon di
Adrès (AVS), kontrol di velosidat, i kumplimentu ku ‘Payment Card Industry Data Security Standard
(PCI DSS)’ ta esensial pa mitigá e riesgo relashoná ku aktividatnan froudulento.
Desaroyadó di wèpsait mester sigurá ku e portalnan di pago ta ekipá ku e teknologianan di
detekshon di froude mas resien, inkluyendo sistemanan ‘Completely Automated Public Turing test
to tell Computers and Humans Apart (CAPTCHA)’ pa prevení aktividat froudulento outomatisá i
manual efektivamente.
Kompromiso pa Transakshonnan Sigur
Komo regulador i protektor di stabilidat finansiero, CBCS ta enfatisá e importansia di kolaborashon
entre tur partido envolví pa kombatí kriminalidat sibernétiko. Nos ta mantené nos kompromiso pa
garantisá un ambiente di transakshon sigur pa nos komunidat di konsumidó i negoshi pa medio di
promové un sistema di pagamentu efisiente i efektivo. Ku e meta aki, leinan separá pa Proveedor
di Servisio di Pago (PSP) a wòrdu desaroyá i ta den proseso legislativo pa wòrdu implementá. E
‘National Ordinance on the Supervision of Payment Service Providers (NOSPSP)’ lo duna un kuadro
regulatorio mas fuerte pa PSPnan.
CBCS ta urgi tur hende pa keda informá tokante e menasanan di seguridat mas resien i téknika di
prevenshon, bishitando wèpsaitnan i plataformanan di media sosial di CBCS, bo banko lokal òf
proveedó di servisio, i plataforma di edukashon finansiero regularmente.
Willemstad, 29 di mei 2024
CENTRALE BANK VAN CURAÇAO EN SINT MAARTEN
