BUNITA EXPOSICION DI ARTE ‘RELAHA, RECARGA Y INSPIRA’ DI LIDER DI MEP

 

 

Partido MEP:

 

Lider di MEP Evelyn Wever-Croes:

 

En conexion cu 15 aña den politica,

BUNITA EXPOSICION DI ARTE ‘RELAHA, RECARGA Y INSPIRA’ DI LIDER DI MEP

“Tur momento di reflexion y creatividad ta vital pa e bienestar personal”

ORANJESTAD – Diabierna 31 di mei ultimo, Lider di Partido Movimiento Electoral di Pueblo (MEP) Evelyn Wever-Croes, a celebra su 15 aña den politica cu un ‘Wine & Cheese’ y un exposicion di arte na Cede di MEP na Santa Cruz. E exposicion aki ta refleha su creencia den e poder profundo di arte pa ‘Relaha, Recarga y Inspira’.

 

Den su discurso duna, Lider di MEP a expresa su gratitud profundo na tur esnan presente, na tur su esnan cu durante 15 aña a sostene como Lider di e partido mas prestigioso di nos pais y tambe como Lider di nos pais. El a recorda nos cu tur momento di reflexion y creatividad ta vital, no solamente pa bienestar personal, pero tambe pa e pasion continua y dedicacion necesario pa haci cambionan positivo.

 

“15 aña despues ta un momento pa para keto y wak bek atras riba e añanan aki den politica cu no tawata facil pero un honor grandisimo di a tuma e paso pa drenta politica, lidera nos prestigioso partido y tambe liderando nos pais pa di dos termino”, Lider di MEP a expresa.

 

Tawata un anochi hopi ameno na unda cu Lider di MEP a expone e cuadranan bunita y colorido cu el a pinta den momentonan cu e ta tuma pa recarga y relaha. Esaki sigur a duna e exposicion aki un toke special. Tawata tin tambe oportunidad pa cumpra cuadranan aki cua fondo ta bay den e fondo pa campaña pa Eleccion 2025.

 

“Mi ta gradici tur esnan cu a sostene mi durante e 15 añanan aki, cu a yuda mi cu e trabou duro, a yuda mi campaña, conseheronan, esnan cu ta duna criticanan constructivo pa asina mi por mehora den tur loke mi tin cu haci. Cada sosten a duna mi forsa pa continua mi trabou cu mas determinacion, curashi, fe y amor.

 

Lidera un partido y lidera un pais ta responsabilidadnan hopi grandi y ta bin cu hopi sacrificio, specialmente sacrificio familiar y di tempo priva. Pero mi ta gradici Dios tur dia pa duna mi e forsa y iluminacion pa tuma e pasonan necesario. Mi ta spera cu añanan nos dilanti pa sigui ilumina mi pa tuma e miho desicionnan pa pais Aruba”, Lider di MEP Evelyn Wever-Croes a expresa.