DESISHON A KAI PA KÒRSOU BIRA MIEMBRO ASOSIÁ DI CARICOM

DESISHON A KAI PA KÒRSOU BIRA MIEMBRO ASOSIÁ DI CARICOM

Willemstad – Promé Minister sr. Gilmar Pisas a risibí un karta di parti e Sekretario General di CARICOM sra. Dr. Carla Barnett fechá dia 6 di yüni 2024 den kual e la informá Promé Minister sr. Pisas di e desishon ku CARICOM a tuma dia 4 di yüni 2024.

E hefenan di Gobièrnu di CARICOM a tuma e desishon ku e aplikashon di Gobièrnu di Kòrsou pa bira miembro asosiá di CARICOM a keda aprobá.

Esaki a tuma lugá despues ku e ekipo di Kòrsou i e sekretariado di CARICOM resientemente a terminá e negosashonnan riba e tratado di atmishon pa Kòrsou.

Konsekuentemente, Promé Minister sr. Gilmar Pisas a keda invitá pa firma e tratado di atmishon huntu ku e presidente di CARICOM dia 3 di yüli próksimo na Grenada.

Aktualmente Gobièrnu di Kòrsou ta kanando e proseduranan legal den Reino Hulandes pa konkretisá e miembresiá di CARICOM.

Próksimamente Gobièrno di Reino lo aprobá e konsepto di e tratado ku Promé Minister Pisas lo bai firma na Grenada.

Na e momentunan aki CARICOM ta konsistí di 20 pais, di kual 15 ta miembro i 5 ta miembro asosiá. Kòrsou lo bira pues e di 6 miembro asosiá di CARICOM.

Esaki ta un logro grandi pa Kòrsou, debí ku komo miembro asosiá di CARICOM Kòrsou lo partisipá den e desaroyo di e komunidat Karibeño i lo tin diferente benefisio den forma di kolaborashon i integrashon regional riba diferente terenonan kaminda tin interes komun.

Esakinan ta enserá aktividatnan ekonómiko, seguridat regional, proyektonan riba tereno di medio ambiente i desaroyo sosio-kultural.

Tur esaki kombiná ku nos posishon den Reino Hulandes, relashon ku Union Europeo i Merka ku ta pone Kòrsou den un posishon úniko pa sigui fortalesé su posishon stratégiko den region di Karibe.