MLB ELITE CURAÇAO A BIAHA PA VERO BEACH FLORIDA

MLB ELITE CURAÇAO A BIAHA PA VERO BEACH FLORIDA
WILLEMSTAD – Hungadónan di MLB Elite Development Program (EDP) Curaçao ta na Vero Beach, Florida aktualmente pa partisipá na e torneo Breakthrough Series Invitational organisá pa Major League Baseball. E torneo ta konta ku partisipashon di 16 tim di rònt Merka i Puerto Rico i lo tuma lugá di 13 pa 16 di yüni na Jackie Robinson Training Complex aya na Vero Beach, Florida. E 11 hungadónan di Kòrsou ku a keda selektá lo keda reforsá ku 9 hungadó di e programa di Brasil pa asina forma e tim ku lo yama MLB Internashonal.
E torneo di verano di MLB lo ta pa hungadónan U17 di e mihó programanan di desaroyo di beisbòl di MLB. E tipo di torneonan aki semper ta hala hopi atenshon di scoutnan di tur e 30 ekiponan di MLB i tambe scout di universidatnan Merikano. Pues nos hungadónan lo por konta ku hopi atenshon riba nan. E hungadónan di Kòrsou ku a bai ta: Ayden Calmes, Farid Cijntje, Shawn Dambruck, Chey-Niël Delanoy, Dwayne Isenia, Jeremiah Jones, Zhaydire Joubert, Keadan Kuwas, Jaylian Lopez, Ruchano Petronia i Zazil Schoop. E tim lo ta bou di maneho di coach Eduardo de Leon ku a kordiná e programa e último 3 lunanan aki na Kòrsou. Komo ku e la kordiná e program na Brasil den pasado e tin tambe konosementu di e hungadónan di respektivo pais.
E tim di MLB International (Kòrsou/Brasil) lo enfrentá djaweps 13 di yüni e ekipo IS Elite 2025 National (8:30am) i djabierne 14 di yüni lo ta un dia pisá pa nos muchanan ora nan mester hunga dos wega kontra Florida Heat (11:00am) i PRO Youth Foundation Rays (1:30pm). E weganan lo keda di stream live via di GameChanger i por wak via di https://web.gc.com/organizations/vsQn2wM9SWiZ. E sponsornan lokal di e programa ku ta Curaçao Tourism Board (CTB) huntu ku Curaçao Baseball Development Foundation ta desea nos peloteronan tur klase di éksito i ku nan saka kara di Kòrsou i pa nan mantene nos nomber komo ‘Curaçao the island of Baseball’.