Inspektor General prof. dr. Sirving Keli a duna presentashon amplio di sistema nobo ku awor ta bai kontrolá tur establesimentu ku ta bende kuminda i bebida na públiko 

Promé edishon di informashon relashoná ku sistema nobo di kontròl di foodhandlers

Inspektor General prof. dr. Sirving Keli a duna presentashon amplio di sistema nobo ku awor ta bai kontrolá tur establesimentu ku ta bende kuminda i bebida na públiko 

 

Willemstad – Minister di Salubridat, Medio Ambiente i Naturalesa mr. drs. Javier Silvania a invitá tur doño di restaurant, importadónan, supermerkado, horeca, minimarket i tur demas establesimentunan ku ta prepará i bende kuminda, pa un importante seshon di informashon. Durante e seshon aki ku a tuma lugá na Hotèl Renaissance den un sala yen, Inspektor General prof. Keli a duna splikashon amplio di e sistema nobo ku awor ta bai kontrolá supermerkadonan, importadónan i tur otro establesimentunan ku ta bende kuminda i bebida na públiko.

Komo e informashon kisas ta hopi i di sierto grado di komplisidat a skohe pa repartí e materia den 3 sekshon pa garantisá ku un i tur por komprondé e maneho nobo.
Prof. Keli a indiká primeramente ku lo bini kambio den e maneho di kontròl i lo bini un sistemátika nobo pa hasi Kòrsou mas safe. E maneho ta kuminsá for di importadónan, despues benta por mayor i esnan ku ta bende direktamente na públiko. E responsabilidat ta pa doño di e empresa pero aksento di e maneho ta pa sera posibel espasio pa algu bai robes for di momentu ku esaki drenta Kòrsou.

Den e skema aki por mira i kompará maneho bieu i maneho nobo.

Maneho bieu, esta promé ku 1 di aprel	Maneho nobo na vigor for di 1 di aprel
Formalmente no tabatin prosedura pa tuma produktonan den beslag.	Sero toleransia, ta tuma produktonan den beslag konforme kuadro di lei LBHAM.
Produktonan den beslag: ● Por wòrdu duná komo gesto karikativo, ● Por uza komo kuminda pa bestia, ● Por keda destruí.	Ta atendé konforme Lei LBHAM. Produktonan den beslag: ● Den kaso ku e ta safe, por bende esaki na preis redusi, ● Por wòrdu duná komo gesto karikativo, ● Por uza komo kuminda pa bestia, ● Por keda destruí.
Nòrmalmente no tabatin sanshon.	Semper medida di sanshon den kaso di violashon di Lei. Residivismo ta mal intenshon.
Regular ta sera establesimentu.	No ta sera establesimentu, pero por para e proseso si esaki tin algu robes.
Regularmente no tin kontròl interno di e establesimentu mes	Establesimentunan mester tin kontròl interno propio.

Esaki ta e promé edishon di informashon relashoná ku sistema nobo di kontròl di tur establesimentu ku ta prepará, bende i sirbi alimento i bebida na públiko. Inspekshon di Salubridat lo emití 3 diferente informashon di e tópiko aki pa prensa durante 3 dia. Di e forma aki por komprondé i sigui e maneho nobo mas fásil. Keda pendiente pa e di dos edishon mañan. Tur e informashon aki por mira riba Facebook di Ministerio di Salubridat, Medio Ambiente i Naturalesa:
Ministry of Health, Environment & Nature Curacao