Próksimo Tayer di Restorashon di Ref na Boneiru

Próksimo Tayer di Restorashon di Ref na Boneiru

 

Dutch Caribbean Nature Alliance (DCNA) ta hopi kontentu di por anunsiá e próksimo Tayer di Restorashon di Ref na Boneiru, ku ta tuma lugá di 17 pa 19 di yüni 2024 na su ofisina na Boneiru. E evento akí lo trese stakeholdernan, ekspertonan i hendenan di práktika di Karibe Hulandes i otro paisnan huntu pa promové e esfuersonan pa konservashon i restorashon di ref di koral. Tin algun seshon ku lo ta disponibel online pa públiko.

 

E tayer tin komo meta pa kompartí e mihó práktikanan i protokòlnan riba tereno di restorashon di ref. Ku un enfoke riba restorashon di koral i piská, Reef Renewal Foundation Bonaire i Diergaarde Blijdorp (Roffareefs) lo duna algun tayer práktiko den vèlt. E tayer ta investigá tambe e posibilidatnan pa kolaborashon den kuadro di DCNA su programa di Konservashon i Restorashon di e Habitatnan Mas Importante (Conservation & Restoration of Key Habitats).

 

Puntonan di e tayer ku ta destaká mas:

 

• Restorashon di koral: vishonnan di Reef Renewal Foundation Bonaire, Caribbean Research and Management of Biodiversity (CARMABI) i SECORE International, inkluso fragmentashon di koral, mikro reprodukshon i téknikanan di reprodukshon di larva.
• Restorashon di herbívoro: e Universidat di Siensia Apliká Van Hall Larenstein lo presentá nan aserkamentu pa restorashon di herbívoronan endémiko, manera diferente espesie di seapel i kokolishi. E herbívoronan ta redusí alga dañino, dunando asina e koralnan un chèns mas grandi pa sobrebibí.
• Restorashon di piská: Diergaarde Blijdorp (Roffareefs) lo presentá algun aserkamentu nobo pa reprodukshon di piská, kaminda e enfoke ta riba piská herbívoro.
• Reprodukshon di koral riba tera: Coral Spawning Lab lo okupá su mes ku e téknikanan pa reprodukshon di koral, reprodukshon di larva i diseño nobo di sistema pa amplia produkshon di koral. Diergaarde Blijdorp ta spònser partisipashon na e tayer.
• MPAConnect/AGRRA: Mensahenan núkleo di Atlantic and Gulf Rapid Reef Assessment (AGRRA) tayer di MPAConnect tokante planiamentu di e mapa di ruta pa restorashon di koral na Florida.

 

Djòin nos online grátis

 

DCNA ta trese un grupo di stakeholder huntu ku ta representá e seis islanan di Karibe Hulandes i ku lo ta personalmente presente na e tayer. Un parti di e seshonnan lo ta disponibel grátis tambe pa públiko via Zoom. Wak e agènda i inskribí bo mes akinan: https://dcnanature.org/reef-restoration-workshop/

 

Edishon spesial di BioNews

 

Despues di e tayer DCNA lo publiká un edishon spesial di BioNews ku vários artíkulo i tambe grabashon di algun presentashon tokante tópikonan di e tayer, ku ta brinda konosementu profundo i ku ta amplia e informashonnan ku nan a kompartí durante e evento. Pa aktualisashon, sigui DCNA via Facebook, Instagram òf BioNews.

E tayer akí ta haña finansiamentu generoso di e Ministerio di Agrikultura, Naturalesa i Kalidat di Kuminda i sosten di Nationale Postcode Loterij.