Representantenan di MCB a hasi apertura simpel djabièrnè atardi: Sta. Rosa Indians ta kue dos viktoria den wikènt inougural di RBI 2021

Representantenan di MCB a hasi apertura simpel djabièrnè atardi:

Sta. Rosa Indians ta kue dos viktoria den wikènt inougural di RBI 2021

 

WILLEMSTAD – Djabièrnè anochi Tio Daou Ballpark tabata esenario pa apertura di e di seis edishon di RBI Curaçao bou di ouspisio di Curaçao Baseball Development Foundation (CBDF) i ku sosten tur aña di nobo di spònser prinsipal Maduro & Curiel’s Bank (MCB). Un apertura simpel ku ta pasa den e tempu nan aktual di Covid-19. Dirigentenan di RBI Curaçao a kompaña representantenan di MCB pa e prome lansamentu di temporada 2021. E promé wega di temporada entre Wild Cats/St. Michiel Dodgers i Sta. Rosa Indians tabata un digno di wega di apertura. 

Tabata e ekipo di kas Indians a logra un viktoria pèrta di 7-6 riba Dodgers. Picher ganador tabata Shurick Mouricia i mihó bate tabata Allen Hollander ku a bai di 3-2 pa Sta. Rosa ku un honron. Picher pèrdèdó tabata Nathan Isenia miéntras ku Brandon Piña a bai di 2-2 pa Dodgers.

Djasabra tabatin tres wega programa i asina tur ekipo partisipante a mira akshon despues di dos fecha di kampionato. Den promé wega Marchena Braves a gana Groot Kwartier Astros ku skor di 13-2. Picher ganador tabata Quishanic Martes i Q-Shawn Gertruida a bai di 2-2 na bate. Tabatin vários otro bateadó ku a bai di 3-2 pa Braves. Picher pèrdèdó pa Astros tabata Nathanael Milton Diaz i Raydison Walter tabatin mihó bate di 2-2.  Despues Royal Scorpions Cardinals a pasa fásilmente riba Sta. Maria/Suffisant Royals 15-0. Steaven Amorsingh a resultado picher ganador i a bai ruta kompleto i permití solamente un hit. E mes huntu ku Jayverson Rellum a bai di 1-1 na bate pa Cardinals. Alexys Snel a pèrdè pa Royals i  Dylan Wilson tabatin nan úniko hit. Den e wega final di djasabra, Wild Cats/St. Michiel Dodgers a logra bòns bek di nan derota di e anochi anterior den un wega ku mester a bai ‘Tie Break Rule’. Dodgers a gana Firebird Padres ku skor pèrta di 4-3 lagando nan den tereno. Picher ganador tabata Keorden Leito i Greggson Juliana a bai di 2-2 pa Dodgers na bate. Eddyson Jobs a resultá picher pèrdèdó pa Padres miéntras ku Jaedan Godfried a bai di 2-2. Riangelo Windster tabatin un tripel den e wega aki. 

Djadumingu mainta e ekipo di Sta. Rosa Indians a sigurá nan di dos viktoria di e wikènt inougural di RBI 2021 ganando di Royal Scorpions Cardinals ku skor di 6-3. Den un wega bon bringa i pèrta a mira Indians tuma bentaha ku 4 kareda den di 6 ining i no a mira atras mas. Jamil Zalm a resultá picher ganador, Shammy-Thayne Maximiliana i Gensley Ryan ámbos a bai di 3-2 pa Indians. Gensley Ryan i Allen Hollander tabatin doblete den e wega aki. Picher pèrdèdó tabata Lyendley v/h Kruis i  Churendrick Inees, Riverson Koeijers i  Yoswiel Ledesma Acevedo  a bai di 2-1. Acevedo tabatin un doblete. Den otro resultadonan ayera Firebirds Padres a logra un viktoria di 7-1 riba Groot Kwartier Astros. Picher ganador tabata Dmitri Dijkhuizen i Riangelo Windster a bai di 2-2 di kual un doblete. Picher perdedo tabata Jared Veeris i Christopher Marshall a konektá e úniko hit pa Astros. Den último wega di fin di siman Marchena Braves a gana di Sta. Maria/Suffisant Royals ku skor di 13-7. Kevin Overman a bai di 3-3 pa Royals miéntras ku Raydjen Rosina a bai di 2-2 pa Braves ku un bataso di kuater skina.

Kampionato di RBI 2021 patrosiná pa MCB lo kontinuá ku vários wega próksimo fin di siman kuminsando for di djabièrnè na Tio Daou Ballpark. weganan di RBI Curaçao 2021 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook.