“TPK ta sera kapitulo di bakunashon i habri kapitulo di invershon” Rennox Calmes: pero TPK ta keda e watchdog

 

“TPK ta sera kapitulo di bakunashon i habri kapitulo di invershon”
Rennox Calmes: pero TPK ta keda e watchdog

 

Awor aki Korsou mester di hendenan transparente, integro, determina ku karakteristikanan di ta lider i no kobarde. 

Partido Trabou pa Korsou TPK durante e ultimo rueda di prensa dia 14 oktober 2021, a tuma nota ku minister presidente despues di a menasa pueblo di Korsou durante 2 rueda di prensa sigui tras di otro, a trese klaridat riba bakunashon. Durante e rueda di prensa aki, minister president a bisa bon kla: bakunashon no ta obligatorio.Tambe esaki a keda mustra durante di e rueda di prensa den e “slideshow” aksentua ku kolo ros i blanku.

Trabou pa Korsou ta hopi satisfecho ku e desishon aki di minister presidente i den mesun rosea ta felisita pueblo di Korsou paso demokrasia i hustisia a prevalese. Gobiernu tei pa tur hende, esnan pro bakuna i esnan kontra bakuna. Kompanianan manera “FLOW”, algun banko i sierto doño di trabou ku a hinka den nan kabes pa manda mail pa obliga trahadonan bakuna, TPK ta spera ku boso tambe a kompronde e mensahe di minister presidente bon kla. Na Korsou ta lei di korsou ta konta. Pueblo bo tin e garantia ku TPK ta keda e “watchdog”.

TPK ta habri kapitulo di invershon
Pa TPK invershon ta loke mester tuma luga na e momentunan aki. Invershon ta nifika desaroyo. Ta momentu pa hasi invershon pa ekonomia kuminsa lora. E prome paso ta habri Refineria di Korsou bek. Invershon no solamente den proyektonan di edifisio i opheto, pero tambe den hende, den ensenansa ku bista riba futuro, pero tambe invershon den konosementu di nos kultura i historian den skol, bo propio identidat na importante. Unda nos ke pa Korsou ta aki par di aña? Awor si nos mester inverti den industria di agrikultura pa produsi kuminda. Krea insentiva pa digital nomadsnan bin Korsou. Invershon den inovashon i e kadena energetiko pa baha nos preis di koriente. Ta kosnan ku nos mester atende pa trese invershonista lokal i internashonal pa krea kuponan di trabou. Di e forma aki Korsou su parti sosial i salu ta mehora. Fondo di penshun i svb tambe ta stabilisa.

Korsou no por permiti pa komete e mesun erornan di pasado si, manera inverti hopi sen (80%) den traha raport, pero (20%) so den e proyekto mes. Pero tampoko faborese un grupo so i tene e otronan afo. Ta huntu mester hasi esaki. Parti e bolo pa tur hende krese pareu. Tampoko keda diskuti 10 aña largu i na final niun hende no ta tuma desishon. Awor aki no ta momentu pa e mesun probechadonan di semper. Awor aki Korsou mester di hendenan transparente, integro, determina ku karakteristikanan di ta lider i no kobarde. Hendenan kobarde ku ta keda yora of tin miedu pa tuma desishon of ta tambalia pa kualke atake fuerte kontra di nan, mester keda na banda awor aki.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: