Tin klaridat riba e situashon di supsidio di diferente fundashon

Tin klaridat riba e situashon di supsidio di diferente fundashon

Geplaatst op 20 February 2020 dor di Ministerio Desaroyo Sosial, Labor i Bienestar

Willemstad – Ámtenarnan di ministerio di SOAW a sinta djárason atardi ku representantenan di e diferente fundashonnan ku a risibí ménos supsidio ku nan a spera. Esaki komprendibelmente a kousa basta konsternashon.

A pidi e fundashonnan presente diskulpa pa e malkontentu i duda ku e situashon a kousa i a splika ku no ta e intenshon pa a sigui kòrta den nan supsidio.

Despues ku a konstatá e situashon a kuminsá traha mesora pa remediá e situashon i por bisa ku a haña e fórmula pa hasi esaki.

Pues, por informá komunidat ku a yega na un solushon pa e problema i ku sin mas lo traha semper ku bienestar di sigur e muchanan ku ta ser kuidá dor di e fundashonnan aki i tambe e trahadónan ku ta kuida i forma e hóbennan aki.