4 detenshon durante di investigashon ladronisianan di skuter i atrako
KUERPO POLISIAL KÒRSOU KOMUNIKADO DI PRENSA
22 yüni 2024
4 detenshon durante di investigashon ladronisianan di skuter i atrako
287/2024
Relashoná ku diferente kaso di ladronisia di skuter ku a tuma lugá durante di último
simannan, djabièrnè 21 di yüni 2024 e tim ku ta investigá ladronisia di vehíkulo, tim di
atrako i e tim di mantenshon di òrdu (handhaving) a tene akshon den Montaña Abou.
Durante di e akshon aki, polis a detené kuater (4) sospechoso i a konfiská un skuter i un
bròmer.
Alrededor di 17.20’or a detené den Kaya Berom, e hòmber D.M.E. di 34 aña di edat nasé
na Kòrsou. E sospechoso aki a keda detené relashoná ku un kaso di atrako ku a tuma lugá
dia 7 di febrüari 2024 na un toko i dia 16 di yüni 2024 na un adrès na Kaya Tibourin.
E sospechoso aki ta enbolbí tambe den un kaso di ladronisia di skuter dia 11 di yüni 2024 na
un adrès riba Cas Coraweg.
Pa mas o menos 17.30’or polis a detené e hóben maskulino G.R. di 12 aña di edat nasé na
Kòrsou, pa un ladronisia di bròmer ku a tuma lugá dia 18 di yüni último den Kaya Banana di
Ref. Su detenshon tambe a tuma lugá den Kaya Berom.
17.45’or a detené den e mesun kaya aki e hòmber C.P.P. di 18 aña di edat nasé na Kòrsou.
E ta wòrdu sospechá di un ladronisia di skuter na un adrès riba Cas Coraweg dia 11 di aprel
2024 i tambe pa enkubrimentu.
Banda di 17.30’or polis a hasi e di kuater detenshon den Kaya Berom. A detené e hòmber
U.S. di 42 aña di edat nasé na Kòrsou.
Detenshon di e último sospechoso aki tabata pa no sigui òrdu di polis.
A presentá e kuarteto aki dilanti di un fiskal ouksiliar ku a ordená su enkarselamentu
pendiente di mas investigashon.