Pregunta na Ministernan di Salubridat, Medio Ambiente i Naturalesa Sr. J. Silvania òf sr. G. Pisas riba e maneho di THZ; ‘Un konfushon total’!

 

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Kòrsou, 24 yüni 2024

 

Tópiko: Pregunta na Ministernan di Salubridat, Medio Ambiente i Naturalesa

Sr. J. Silvania òf sr. G. Pisas riba e maneho di THZ; ‘Un konfushon total’!

 

Honorabel sra. America-Francisca,

 

Señora Presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko; ‘Un konfushon total!’ na Ministernan di Salubridat, Medio Ambiente i Naturalesa sr. J. Silvania òf sr. G. Pisas.

 

 

Atentamente,

 

 

 

 

Ana Maria Pauletta

Miembro di Parlamento, Partido Alternativa Real

 

 

 

Ministernan di Salubridat, Medio Ambiente i Naturalesa

Na e minister korespondiente sr. J. Silvania òf sr. G. Pisas

Colon

Presente

 

Kòrsou, 24 di yüni 2024

 

Tópiko: Un konfushon total!

 

Apresiabel Minister sr. Silvania i Minister sr. Pisas,

 

Resientemente Kòrsou a lanta totalmente konfundí, despues ku ministerio di GMN a presentá un maneho nobo pa ku supervishon i kontròl di higiena i produktonan kaduká.

 

E kambio aki ta keda presentá eksaktamente 4 luna despues ku e tim di THZ a keda, humiá dor di un minister di Gabinete Pisas. Nos tur ta kòrda e tumulto ku a presentá na momentu ku un minister di Gabinete Pisas a drai bèk desishon di e tim di THZ. Ainda ta deskonosí pa pueblo di Kòrsou, ta kua minister di gabinete Pisas, ta pone amistat polítiko, riba salú di e pueblo. Remarkabel ta ku despues di e kontròl di dia 17 di yanüari 2024, no tabatin ningun kontròl mas di higiena i tampoko karni kaduká dor di e tim di THZ.

 

Durante di e último siman, suskrito a papia ku diferente stakeholder, tantu di ministerio, komo pafó di ministerio di GMN. I tin algun punto di diskrepansia:

 

Punto 1: Fecha i desishon Kambio di Maneho  ( Dos maneho?)

Durante e reunion di 29 di ougùstùs di 2022, minister anterior sra. Janga  i Inspektor General sr. Keli a informá Parlamento ku tin un kambio den e maneho di supervishon i kontròl di higiena i karni kaduká. Remarkabel ta ku e kambio aki a keda presentá despues ku e tim di THZ huntu ku e tim enkabesa dor MEO a haña 29.000 kilo na produkto kaduká. Den e kambio ku Minister Janga a presentá na Parlamento, Inspekshon di Salú Públiko, lo a tuma e supervishon i kontròlnan di karni kaduká i tambe e supervishon i  kontròl di higiena for di departamento di THZ.

 

Apesar di e kambio presentá 29 di ougùstùs 2022 dor di eks-minister Janga, THZ huntu ku e tim di kontròl di higiena bou di guia di MEO a keda hasi e kontròlnan, te ku 17 di yanüari 2024.

Riba 21 di yanüari 2024 minister Silvania a informá komunidat por medio di un komunikado, ku e lo presentá un maneho nobo, kaminda THZ lo keda fortifiká. Lokual ta kontradiktorio ku loke a keda presentá den parlamento, dos aña promé, dor di kolega di sr. Silvania, sra. Janga.

 

Ta konseho di minister di Gabinete Pisas a tuma e desishon pa kita e mandato di kontròl for di e tim di THZ na aña 2022?. Minister Silvania, no tabata na altura di e maneho aki, ora el a saka su komunikado, dia 21 di yanüari 2024 ? Tin konsehonan di e ministerio di GMN pa sustentá e desishon pa pone e kontròl bou di Inspekshon i ken di ministerio di GMN a skirbi e konsehonan aki?

 

 

 

 

Punto 2: Ta ken tur ta stakeholders na momento di un kambio drástiko asina aki:

Den e mesun komunikado, fechá 21 di yanüari 2024, sr. Silvania a indiká di lo presentá un maneho nobo pa ku supervishon i  kontròlnan di higiena. Esaki lo sosodé despues ku e hiba un kombersashon ku representantenan di komersio. Suskrito ta suponé ku ademas di a papia ku komersio a papia ku sektor di salú tambe, entre otro ku THZ, sektor dirèktùr i SG di e ministerio, pa asina garantisá ku salú di siudadano ta keda prioridat number unu..

 

Den kuadro di esaki suskrito kier sa si ministerio di GMN a duna konseho riba e maneho presentá dia 10 di yüni 2024 na Hotel Renaissance i tambe esun presentá 29 di ougùstùs 2022 den sala di parlamento?

 

Punto 3: Den e maneho nobo ken ta kontrolá Inspektor General ?

Den e maneho nobo ku a keda skirbi i presentá dor di Inspektor General di Salú Públiko sr. Keli, e mesun Inspektor General di Salú Públiko ta haña tur kontròl den su man pa loke ta trata kontròl di higiena i karni kaduká. Pero no tin un bista kla, ken lo kontrolá inspektor General, segun ‘warenlandsverordening’ e último ‘schakel’ ta minister. Dùs den e maneho nobo a kita un ‘schakel’ di kontrol for di e maneho i pone esaki den man di solamente Inspektor General i Minister.  Esaki ta remarkabel.

 

Den pasado ta hopi biaha e tim di kontròl a ser konfrontá ku situashonnan a-higiéniko na momento di kontròl. I komo pais i sigur nos gobernante nan, no por hasi wega ku kontrol di kuminda i bebida. A base di e puntonan trese dilanti, suskrito tin e siguiente preguntanan ya kaba ariba menshoná i algun adishonal:

1. Minister ta na altura ku no tabatin ningun kontròl mas di THZ for di 17 yanüari 2024. Minister por informá parlamento, ta kua ta motibunan pa kual no tabatin ningun kontròl, despues di 17 di yanüari 2024? Minister lo por informá Parlamento si e tim di THZ i/òf e tim di kontròl enkabesa dor di MEO a haña mandato pa no kontrolá mas te ora bini ku un maneho nobo?
2. Minister por fasilitá Parlamento e maneho nobo presentá 10 di yüli 2024, por eskrito, ademas di e dekretonan nashonal riba kua esaki ta basá, tantu pa karni kaduka, komo esun pa kontrol di higiena?
3. Minister lo por fasilitá Parlamento e konsehonan di ministerio di GMN riba kua e desishon aki ta basá?
4. Suskrito ta asumí ku tin motibunan bálido pa kita e mandato di supervishon i kontròl for di e tim di THZ, minister lo por splika dikon a skohe pa den e maneho nobo, kita e e mandato di supervishon i kontròl di higiena for di THZ i pone esaki bou di Inspekshon, esaki despues di minister Silvania su komunikado fechá 21 di yanüari 2024?
5. Minister lo por informá Parlamento si Inspekshon Salú Públiko a realisá kontròlnan di karni kaduká òf di higiena, despues di 17 di yanüari 2024?
6. Minister por informá Parlamento si tabata un eskoho konsiente pa no ehekutá e maneho ku a keda presentá den parlamento 29 di ougùstùs 2022? I si ta mesun maneho ku a keda presentá dia 10 di yüni 2024? I si ta mesun maneho, kua tabata e motibunan, pa awor si implementá esaki?
7. Minister por informá kuantu trahadó tin na Inspekshon Salú Públiko i kuantu di nan lo ta okupá ku e trabounan di kontrol? Minister ta di opinion ku e kantidat di personal ta sufisiente pa e kantidat di trabou?
8. Minister lo por informá Parlamento si e tim di kontròl enkabesa dor di MEO lo keda eksistí bou di e maneho nobo?
9. Minister lo por informá Parlamento si e tim di THZ aktualmente tin sufisiente personal pa hasi e trabounan nesesario, entre otro kontròl di sangura, kontròl di awa i krèshnan?

Esaki ta preguntanan ku suskrito tin a base di e proseso ku a kana pa yega na e maneho nobo aki. Suskrito ta keda pendiente di e kontestanan. Suskrito tin pregunta tambe pa loke ta trata e kontenido di e maneho, esaki lo sigui den un siguiente karta ku pregunta i/òf petishon di reunion.

 

Danki di antemano,

 

 

Ana Maria Pauletta

Miembro di Parlamento, Partido Alternativa Real