Yegada di Olga Tañón pa

Hak’e Curaçao Summer Festival

E Diva di Merengue a yega!

 

WILLEMSTAD: Tabata ayera mèrdia alrededor di 4’or di atardi ku e Diva di Merengue,  Olga Tañón a yega Kòrsou pa su presentashon mañan anochi den Hak’e Curaçao Summer Festival. Olga Tañón, ta programá pa habri e festival 20:45. Portanan lo habri for di 7’or di anochi pa kuminsá akomodá públiko ku mañan lo ta grandemente den Curaçao Airport Venue. Ta primintí un anochi elekrisante, ku hopi merengue, un vibrashon tropikal ku lo inspirá baile i goso henter anochi. Sòru pa bo tei trempan di manera ku bo por ubiká bo mes te dilanti di esenario! Karchinan pa djabièrnè anochi ta 100 florin i ta den su rekta final, ora kaba lo bira 150 florin.

 

Riba e anochi aki tambe lo tin presentashon di Tributo Al Merengue feat. Fernando Villalona, Wilfrido Vargas i Kinito Mendez ku respaldo musikal di un ‘All Star Band’ Internashonal- e artistanan ta na Kòrsou kaba!  Hitnan ku a dominá radio emisoranan den dékada 80 i 90 lo zona ora ku Tributo Al Merengue presentá. Públiko lo ta den espektativa p’e repertorio di AxL & Orchestra tambe. Riba ámbos dia di festival ta importante pa públiko yega trempan.

 

A pone stul pa djabièrnè anochi

Konsiderando e impakto di e line-up i e grupo meta di djabièrnè  anochi spesífikamente, organisashon a pone un kantidat di stul di manera ku si e pianan kansa di baila, por sosegá un ratu. Ta pidi públiko si, pa no keda sintá, pero disfrutá di e festival. Esaki ta loke ta duna ánimo n’e artistanan tambe pa sigui duna e mihó riba e anochi di  Hak’e Curaçao Summer Festival. Olga Tañón ta riba un gira ku ta sold-out na diferente siudat den Latinoamérika, ta nifiká ku e ta bin duna ‘tur ku tin’ na Kòrsou!

 

E ambiente di festival:

Tin un foodcourt pa tur esnan ku yega trempan na Curaçao Airport Venue; kome, bebe, sosialisá i antisipá e promé presentashon di anochi. Manera tur hende sá, e aña aki tin 2 sekshon; General i Balcony (VIP). Organisashon a skucha fei públiko i a eliminá e VIP Standing pa krea un área di festival grandi brindando oportunidat na un i tur pa yega serka dje artistanan. Si bo yega trempan, lo bo ta t’e dilanti! Karchinan ta optenibel na, Ticketpoint Zeelandia, 24 Uur uit de Muur, Mensings Caminada, Van den Tweel i Vanddis. Pa informashon di VIP sekshon Balcony òf Platinum por tuma kontakto na: +5999-5209700 òf bishitá www.hakecuracao.com