Último moneda di Antia Hulandes: A bati e promé moneda konmemorativo ‘Ayó NAf’

WILLEMSTAD/PHILIPSBURG — Ayera, a bati e promé moneda konmemorativo ofisial ‘Ayó NAf’,
di 5 florin, na Koninklijke Nederlandse Munt (KNM) na Houten. Riba e moneda spesial di plata
akí, por mira tur e paranan ku ta aparesé riba e biyetenan di Antia Hulandes: blenchi, flamingo,
chonchorogai, barika hel i chuchubi, kompañá pa e teksto: Vaarwel NAf – Farewell Naf – Ayó
Naf.
Esaki lo ta e último moneda di Antia Hulandes produsí pa e paisnan Kòrsou i Sint Maarten. Despues
di a sirbi pa mas di 70 aña komo e valuta di inisialmente seis, despues sinku i finalmente dos isla
den Reino, florin di Antia Hulandes lo ser remplasá pa florin karibense entrante 31 di mart 2025. E
paranan ilustrá riba e moneda ta suprayá e konekshon ku tin entre e biyete- i monedanan di NAf.
E moneda konmemorativo lo ta na benta for di fin di e luna akí. Tambe, lo produsí moneda di NAf
5 di despedida ku kalidat di sirkulashon.
Batimentu di e promé moneda tabata na enkargo di Julian Lopez Ramirez, Presidente di Hunta di
Komisario di Centrale Bank van Curaçao en Sint Maarten (CBCS), den presensia di Presidente di
CBCS, Richard Doornbosch i e historiadó di moneda i èks curator/direktor di Nederlands
Muntmuseum, Albert Scheffers. Den su diskurso na e okashon, Doornbosch a remarká ku e
despedida akí ta unu dòbel: no solamente nos ta bisando ayó na florin di Antia Hulandes, sino
tambe na Koninklijke Nederlandse Munt (KNM) komo suministradó di nos monedanan di
sirkulashon. E islanan (inisialmente Curaçao en onderhorigheden) i KNM (i su predesesornan
hurídiko) tin un relashon ku a kuminsá por lo ménos 230 aña atras, na 1794, na momento ku
Utrechtse Provinciale en Stedelijke Munthuis a bati e promé monedanan di plata, di 3, 1, i ¼ florin
i dos moneda di dòsplaka pa e islanan, riba enkargo di Geoctrooieerde West-Indische Compagnie
(WIC). A marka e monedanan akí ku un ‘W’ pa distinguí nan for di esunnan ku tabata den sirkulashon
na Europa.
CBCS a enkargá produkshon di 500 moneda di plata i 20.000 moneda di sirkulashon. E
monedanan konmemorativo di plata ta kosta NAf. 110,00 pa un i pronto nan lo ta disponibel na
CBCS su Cash Department na Kòrsou i Sint Maarten. E fecha ku nan lo ta na benta ofisialmente lo
ser anunsiá despues. Distribushon di e monedanan di sirkulashon lo tuma lugá via e bankonan
komersial na Kòrsou i Sint Maarten.
Den kuadro di despedida di florin di Antia Hulandes, CBCS a enkargá produkshon di un buki tambe,
ku ta siendo prepará aktualmente. Fecha di publikashon di e buki lo ser anunsiá despues.
Willemstad, 5 di yüli 2024
CENTRALE BANK VAN CURAÇAO EN SINT MAARTEN